Reteniu l’avión presidencial d’Evo Morales en Viena

As sospeitas de que o fugau extreballador d'a CIA estadounidense Snowden podese estar en l'avión d'Evo Morales, ha feito prener ista mida sin precedents enta un chefe d'estau

Evo Morales (Foto: Kris Krüg)

Evo Morales (Foto: Kris Krüg)

Ahiere martes, o president boliviano, Evo Morales, viachaba dende Moscú (do yera en una cumbre) ent’o suyo país, quan, os Estaus francés y portugués, y posteriorment o espanyol y l’italiano, le negoron a posibilidat de cruzar por os suyos territorios. L’avión habió d’aterrizar en Viena debiu a iste imprevisto. A razón d’ista actitut estió a sospeita d’a presencia d’Edward Snowden, antigo miembro d’a CIA y d’a NSA, buscau por Estaus Unius por revelar documentos secretos oficials sobre os programas de vichilancia d’iste país y que se troba en territorio ruso.

A policía de l’aeropuerto de Viena rechistró l’avión, con permiso d’o piloto, sin trobar-ie bayo de Snowden. Miembros d’embaixadas, como a espanyola, querioron tamién inspeccionar l’avión, pero no consiguioron permiso. Dimpués d’isto, os países que han vetau o vuelo de l’avión de Morales por o suyo territorio, han permitiu que pase por os suyos países y l’avión presidencial ha continau o viache de mediodiyas. L’avión ferá una escala en as Islas Canarias.

O Gubierno boliviano, de voz d’o suyo vicepresident, Álvaro García Linera, denuncia que o suyo president ha estau “seqüestrau” baixo orden d’Estaus Unius fendo servir a os países europeus, pues Bolivia ye un d’os países que Snowden ha trigau pa pedir asilo. Asinas mesmo, denuncia a “violación d’a Convención de Chinevra” respective a vuelos oficials y uso d’espacios aerios y aeropuertos, pues os vuelos d’os presidents tienen immunidat, y ha clamau a enfrontinar-se contra “o colonialismo y l’imperialismo” enta America Latina y demandó que “os gubiernos d’America Latina puedan reunir-se d’emerchencia pa prener posición sobre iste abuso, hue America Latina ye estando chafada“.

Diversos mandatarios latinoamericanos se’n facioron por a situación d’Evo Morales, como o president venezolano, Nicolás Maduro; a presidenta d’Archentina Cristina Fernández u o president d’Equador, Rafael Correa, que han feito un poder pa aduyar a o suyo socio boliviano.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.