Retes socials, vadas y a vida mesma

Dani Torres Burriel

Ye curioso que a mida que un va fendo anyos en l’emplego d’os retes socials istas se van retratatndo como referencias d’a realidat cutiana. Por qué digo isto? Porque son ya bellas quantas ocasions en que he puesto uellar un cierto patrón d’emplego y rispuesta d’istas quan un feito de l’actualidat pasa. Y no deixa de ser divertiu pensar-ne.
O zaguer 14 de noviembre i habió una vada cheneral en l’estau espanyol. Vada a qui s’adhibioron totz os triballadors y triballadoras que, d’a maniera que siga, creboron a medrana y as coaccions que dende as suyas interpresas podioron tener ta no fer-lo. Ye de dar que os retes socials son un espacio an que podebamos prener o pulso d’a chornada.

Con ista ya en son 3 as convocatorias de vada cheneral en l’estau espanyol que he viviu a traviés d’os retes socials, más que más, dende Twitter. A contimparanza d’a primera con a zaguera ye un exercicio de repasada historica. Mientres que a vada contra Zapatero estió, en o mio twitter, un exercicio d’espontaneidat y d’acción intelectual u visceral d’as presonas que tuiteyaban, a zaguera ha estau poco menos que la execución d’un plan estratechico, feito en a cocina con anterioridat y con un camatón de hashtags pensaus ta ser trending topic. Dica astí, cosa de nuevas.

D’isto, o que me pareixe más ta remarcar, ye que dillá d’as estratechias d’os consultors de social media d’uns y atros, o patrón de comportamiento que m’he mirau en l’acción d’os usuaires ye o mesmo. Bi’n ha qui nunca no se significa y en un diya de vada, por sospresa, mos fan conoixer a suya delera d’atizadors oficials d’os sindicatos. Bi’n ha, tamién, qui s’arrebulla en a bandera d’o dreito a o triballo (encara que o diya d’antis digan que no tienen ganas de triballar) y chilan contra os piquetz sindicals, que, en a suya boca, pareixen os risponsables d’a muerte de Manolete.

Tamién existe o modelo d’usuaire que s’adedica a retuiteyar a otris, ta fer pasar que a suya quiesta equidistancia se’n veiga inalterada. Y isto zaguer se’n vale ta uns como t’atros. Y, prou que sí, existen qui, por sospresa, fan burro falso y se callan. Son tot l’anyo chilando contra o gubierno que toca (u a favor d’ell) y en os diyas que pareixen clau, fan callada y desapareixen.

Suposo que no habría de deixar de nombrar a os voyeurs, que son ixos a qui situgariamos en a colla d’os desapareixius, pero que si que i son, leyindo, pero sin tartir. Son os más saputos, o ixo ye lo que creyen. S’adedican a uellar por a  finestra, sin gosar tartir, pero son esfrutando de l’espectaculo en a suya intimidat. Como la vida mesma.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.