Riegos de l’Alto Aragón celebra un sieglo con a presencia de Cañete

O ministro no descartó un futuro trasvase de l'Ebro.

Cañete plegando en o Palacio de Congresos (Foto: D.CH. A.)

Cañete plegando en o Palacio de Congresos (Foto: D.CH. A.)

Riegos de l’Alto Aragón prencipió iste miercols con os actos que celebran o suyo primer sieglo d’existencia y que se prolargarán mientres 20 meses, plegando dica 2015, anyada que ferá o sieglo d’a lei 7/1915 que creyó ista entidat. L’acto, celebrau en o Palacio de Congresos de Uesca, estió enguerau por o ministro espanyol d’Agricultura y meyo ambient, Miguel Arias Cañete, l’alcaldesa d’a ciudat Ana Alós, o conseller d’Agricultura y Meyo ambient, Modesto Lobón, y César Trillo, president de Riegos de l’Alto Aragón.

En a suya intervención, Cañete anunció que a balsa d’Almudevar sería a “prioridat numero uno” cuanto a las obras hidraulicas demandadas por Riegos de l’Alto Aragón, por debant de l’entibo de Biscarrués. Cuanto a ista obra, o ministro sinyaló que asperaba que podese prencipiar-se en ista anyada, encara que no confirmó cosa y dió prioridat a la balsa d’Almudevar. Tamién charró sobre atros prochectos hidraulicos, como l’entibo de Montearagón a on que reconoixió bells problemas en a execución d’a obra, u o recreiximiento de Yesa d’o que dició que continaría con o ritmo “normal”, dimpués d’haber puyau o presupuesto atros 30 millons d’euros y de continar fendo os treballos d’estabilización d’as laderas, por os incidents habius en os zaguers meses.

Preguntau sobre a posibilidat d’un trascole de l’Ebro en o futuro Plan Hidrolochico, no lo descartó mica: “O gubierno no tien mica prevención a priori sobre garra mena d’esquema de funcionamiento dica que tengamos totz os datos de cuencas y quals son os cabals disposables”, declaró.

A coordinadora Biscarrués – Mallos de Riglos, representant d’os afectaus por as obras d’o entibo de Biscarrués y que se oposan a la suya construcción denunció que o ministro no les heba quiesto recibir, oficialment “por problemas d’achenda”. A coordinadora yera celebrando dica o martes as chornadas por o río Galligo y heba convidau a lo ministro ta remerar-le a suya oposición ta l’entibo por “l’impacto economico, meyo ambiental y social” que tendría en toda la redolada d’a baixa galliguera.

D’atra man, o PSOE dició que o ministro Cañete “no yera de fiar” por “os incumplimientos con los agricultors y as obras hidraulicas prometidas”.  Tamién l’acusó de “ixublidar a los agricultors que han perdiu as suyas cullidas por as repetidas engaronadas de l’Ebro”, y de negar-les aduyas. Javier Sada, o portavoz d’iste partiu, demandó que s’accelerasen bellas obras hidraulicas como Biscarrués, Montearagón u o nuevo estudio d’impacto ambiental de Mularroya.

 

 

Fa quasi 100 anyadas, a lei 7/1915 creyaba Riegos de l’Alto Aragón, autorizando a lo gubierno a transformar as tierras de secano en regano y dando-le a ista entidar preferencia en l’emplego d’as auguas d’os ríos Galligo, Cinca, Sotón, Astón y Guatizalema.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.