Río Aragón demanda un cambio en a chestión d’os ríos y regulación d’as malas practicas agricolas

O 85% d'o riego en as Bardenas ye "a manta", lo que fa, seguntes Río Aragón, que se malfurrie l'augua

L’Asociación Río Aragón ha quiesto denunciar en o Diya Mundial de l’Augua as malas practicas que en zonas como Bardenas se fan en os campos, malfurriando augua, escasa, amás en iste anyo de ixuquera. Río Aragón, que luita contra o recreiximiento de l’entibo de Yesa, ha amostrau como en bellas zonas que aproveitan l’augua de l’entibo, o riego a manta contina estando a practica cutiana, una practica que seguntes l’asociación, suposa desaproveitar un recurso como l’augua.

A cifra que da a propia Achenda Local 21 d’Exea ye de un 85% de riego a manta en Bardenas, y en o propio texto se puede leyer que a eficiencia d’iste sistema de riego ye baixa. Dende Río Aragón tamién se critica a contina petición de nuevas obras hidraulicas aproveitando a ixuquera d’istos meses, una practica, que seguntes a organización, no más que fa que s’enample a demanda d’augua en una carrera en “que a manca d’augua sera la norma y no la excepción, como pasa con o trescole Tajo-Segura en Murcia”.

Dende l’Asociación Rio Aragón se reclama una Nueva Cultura de l’Augua, que “frene l’ampliación d’os grans sistemas de riego, a retirada d’o regadío d’as tierras salinizadas, que modernice os retz u sistemas de riego y que permita un caudal d’o río Aragón que le permita vivir y no lo convierta en un calavre como pretenden con o recreiximiento de Yesa”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.