Río Aragón entrega o suyo premio Venero a o profesor José Manuel Nicolau

José Manuel Nicolau con o premio Venero

José Manuel Nicolau con o premio Venero

En una chenta cilebrada o sabado 28 d’aviento en o restaurante A Cadiera de Chaca, l’Asociación Río Aragón ha entregau o suyo premio Venero 2012 a o doctor en Biolochía y profesor d’ecolochía en a Universidat de de Zaragoza José Manuel Nicolau Ibarra.

Dito premio se prencipió a entregar l’anyo 2003 con a finalidat de reconoixer a personas con un camín en pro d’un emplego mas racional de l’augua y en esfensa d’as vals pirenaicas menazadas por grans entibos. En atras ocasións, li’n recibioron o periodista Iñaki Peña, Pedro Arrojo de COAGRET, Manolo Tomás d’a PDE y os tecnicos d’a FNCA José Javier Gracia y Epifanio Miguélez.

En José Manuel Nicolau s’ha quiesto reconoixer l’emparo constant y sabiduría que ha ufriu a os afectaus por o recreiximient de Yesa, ya dende l’anyo 1986 quan se prencipió a intresar por as grieus esferras que tendría ta una zona ya muit castigada por l’actual entibo.

O president de l’Asociación, Luis Solana, le ha feito entrega d’o premio consistent en una escultura de Teresa Pueyo de Piedras Taller Artesano d’a pedrera Torrijos de Chaca y un pergamín con dos estrofas d’a Tronada d’a Ronda de Boltanya. Con as suyas parolas ha quiesto trasmitir o fundo afecto que dende Artieda, Chaca y o conchunto de puestos menazaus por entibos se li tien, y le ha pediu que contine emparando a chusta causa contra o recreiximient de Yesa dica que sía alpartau de raso.

Por parti suya, José Manuel Nicolau ha amostrau a suya satisfacción por o premio recibiu, ha comentau as suyas vivencias a lo largo de totz istes anyos de luita conchunta y ha quiesto resaltar l’eixemplo de dignidat que alzan qui, dende chicotz lugars, s’enfrentan con rasmia contra una alministración sin escrupols y depredadora d’os nuestros recursos naturals.

L’acto ha serviu ta refirmar a firme oposición a o recreiximient de Yesa, denunciar o malfurriar de diners en que s’ha convertiu ista obra, que contina o camín de buena ripa d’atras obras inutils, y prencipiar a preparar a rispuesta a la expropiación parcial que ta finals d’iste mes a CHE quiere levar a cabo en Artieda.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.