Risque d’incendios en tot o país

O gubierno fa recomendacions ta privar en o posible os incendios debant a ola de calor d'iste cabo semana

Un avión chita augua sobre un incendio (Foto: Gubierno)

Un avión chita augua sobre un incendio (Foto: Gubierno)

As altas temperaturas que s’asperan en osdiyas venients, por alto d’os 40º y de traza persistent en muitas zonas, fan que en Aragón exista un ran alto de risque d’incendios forestals, ran que irá creixendo entre o chueves y o viernes.

A dirección cheneral de Chestión Forestal ha feito publica una buena ripa de recomendacions ta que os ciudadans colaboren con l’esfuerzo adedicau a prevenir incendios y as conseqüencias que s’esdevienen d’ells. Dende Chestión Forestal se remera que “cadagún d’os ciudadans, sin garra coste, puede contribuyir a mantener a riqueza d’os recursos forestals”. As recomendacions han estau trestalladas ta os diferents usuarios d’as zonas forestals d’o país.

Ta os ciudadans que visitan zonas naturals:

• No fendo fuego. Ye mas seguro trayer a birolla de casa.
• No chitar colillas ni elementos que puedan pretar-se fuego en o monte.
• No deixar a vasuera en o monte.

Ta os agricultors y ganaders:

• Respectar la vieda de cremar. L’uso d’o fuego ye prohibiu en ista epoca.
• Revisar a maquinaria agricola ta mantener-la en perfecto estau.
• Ir proveyiu d’extintors u atros meyos auxiliars que puedan colaborar en privar a propagación d’o fuego. Ista mesma precacción habrán d’adoptar os usuarios de maquinas u equipes d’unatra mena (sierras, soldadoras, etc.), que puedan chenerar purnas.

Ta os propietarios de viviendas amán de zonas naturals:

• As viviendas y atras construccions amán d’o monte, han de disposar d’una faixa de seguranza, libre de residuos combustibles, vechetación seca y matizos.

Si se troba en as proximidatz d’un incendio forestal:

• Gritar, antis con antis, a o 112 ta comunicar a situgación de l’incendio.
• Si no puede controlar-lo, aluenyar-se por as zonas laterals de l’incendio buscando, cara t’abaixo, a coda d’o fuego.
• Aliente por a nariz procurando tapar con un panyo mullau naso y boca.
• Vaiga siempre en sentiu contrario a la endrecera d’o fumo.
• No vaiga enta barrancos u fondals y prebe de remanir en terreno sin vechetación u ya cremau.
• Si ye en una casa amán d’o fuego, zarre a puerta, as finestras y todas as zonas de dentrada d’aire. Grite a o 112 y comunique a suya situgación.
• Si o fuego ye chicot y puede actuar sin problemas ta la suya seguridat, prebe de fer-lo por a base, prebando d’amortar-lo con augua u sufocar-lo fendo trucos con ramas d’arbol. Sufocau o fuego, tape as brasas y limpie de ramas a suya arredol.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.