Robres aculle hue l’enguero d’o Museu d’a Postguerra

O Museu d'a Postguerra se mantendrá de forma indefinida en o Centro d'Interpretación d'a Guerra Civil de Robres

MUSEO-POSGUERRAl-300x198Hue, chueves 18 de chulio, a las 20.00 horas en o Centro d’Interpretación d’a Guerra Civil de Robres (comarca d’Os Monegros) ye previsto l’enguero d’o Museu d’a Postguerra, a on reposará de traza indefinida.

En parolas de Sofía Jiménez, una d’as creyadoras y empentadoras d’o Museu d’a Postguerra: “O Museu d’a Postguerra naixió como un prochecto expositivo y audiovisual de caracter itinerant allá por l’anyo 2011. Talment os termins “museu” y “itinerant” puedan resultar contradictorios en apariencia, manimenos deliberadament queriemos trencar con a ideya de “museu” entendiu como bella cosa estable, fixa y acabada. Lo resignificamos. Querebanos que estase o museu qui s’amanase a la chent, recorrendo asinas a cheografía aragonesa, querebanos que no estase cosa acabada sino que estase enriquindo-se con nuevas aportacions y querebanos que no contenese solament imachens, textos u obchectos sino que acullise tamién as voces silenciadas entre tantos anyos, o testimonio oral d’as personas que vivioron a postguerra, as suyas memorias, as suyas sensacions, os suyos espantos, a suya rabia, as suyas ilusions trencadas. Porque a luita contra l’alienación politica que sufrioron os vencius y vencidas d’a guerra civil pasa ineludiblement por a plena recuperación d’a parola de totz os que la perdioron u les estió arrebatada.

Os obchectivos que nos planteyamos a la hora d’enfrontinar-nos a iste tema estioron, en primer puesto, o de conoixer y dar a conoixer cómo estioron as condicions de vida a las qualas s’enfrontinoron os vencius y as vencidas d’a guerra civil, que no tenioron ocasión u no querioron abandonar o país, creyendo ilusament que brenca les iba a pasar. Y en segundo puesto, o d’amostrar que a terrible represión que vivió o país no estió conseqüencia d’o desorden natural de qualsiquier postguerra, ni un episodio isolau en o tiempo, sino que estió fruito d’un prochecto organizau y bien estructurau pa aconseguir a reeducación masiva d’una parte important d’a sociedat espanyola.

Manimenos, dimpués de mas de dos anyos de recorriu o museu d’a postguerra mete fin a la suya itinerancia y qué millor forma de fer-lo que en o Centro d’Interpretación d’a Guerra Civil de Robres. Gracias a l’amable invitación d’o centro d’interpretación y d’a Comarca de Monegros, o museu d’a postguerra va a tener un buen puesto an que descansar y poder estar visto por as personas que decidan d’amanar-se ta Robres, en cuenta d’estar acumulando polvo en un fosca falsa”.

Fuent: http://arainfo.org/2013/07/robres-acoge-hoy-la-inauguracion-del-museo-de-la-posguerra/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.