Rubalcaba presentará una moción de censura si Rajoy no compareixe

O PP evitó a semana pasada que o president espanyol diese explicacions en o congreso sobre o caso Bárcenas

rubalcabaO secretaire cheneral d’o PSOE, Alfredo Pérez Rubalcaba, ha alvertiu que si o PP gosaba tornar a empachar a comparecencia d’o president d’o gubierno espanyol, Mariano Rajoy, en o Congreso d’os Diputaus, o PSOE presentaría una moción de censura. Seguntes Rubalcaba, será una moción ‘por a dignidat‘ d’o congreso, que busca que se pueda ‘debatir y votar’. ‘No quiero substituir a o president d’o gubierno, sé que no tenemos diputaus suficients. O que quiero ye que vienga a ista camara y s’explique’ pa privar ‘que en a suya fuga entabant se leve a dignidat d’o Congreso d’os Diputaus, que ye a siede d’a sobiranía popular’, ha sentenciau.

Rubalcaba l’ha dito en una intervención en ubierto debant d’o grupo socialista en o congreso, en que ha asegurau que en o Estau i heba una situación de fallita ‘multiinstitucional’ y una crisi politica ‘insoportable’ y que a vida politica espanyola chiraba arredol de tres scenarios: o de l’Audiencia Nacional y Soto del Real; o d’a siede d’o PP en a carrera Chenova de Madrit; y o Palacio d’a Moncloa.

‘Rajoy ha apadrinau a un delinqüent’

A situación, seguntes Rubalcaba, s’ha enrareciu encara mas con a publicación d’os mensaches de texto que Rajoy intercambió con Bárcenas. Uns mensaches que meten de manifiesto, diz, a connivencia que n’i heba entre totz dos. ‘Ye l’apadrinamiento d’un delinqüent’ por parte d’o president espanyol. ‘O tono d’afecto, protección y d’animo con que Rajoy se diriche a Bárcenas no forma parte d’a relación que un president d’un gubierno ha de dirichir a un delinqüent. Mas bien pareixe a forma con qué belún se diriche a un socio que lo puede acabar metendo en dificultatz’, ha dito.

Petición de dimisión

Rubalcaba ha insistiu en a necesidat que Rajoy presente a dimisión y deixe a atro president. Ha dito que a petición de dimisión ya yera fundamentada fa meses, quan ‘heba uniu a suya suerte a las declaracions de Bárcenas’, pero que agora o escandalo de corrupción afectaba dreitament a Rajoy y s’heba sabiu ‘que no dició a verdat’ quan dició que tot yera falso. A renuncia, ha dito, ye ‘un imperativo etico ineludible y sin ella ye imposible de mantener relacions normals con iste gubierno porque a continuidat de Rajoy ye un problema ta tot o país, porque no ye capable pa dirichir o país‘.

Siet peticions de comparecencia

O PSOE ha pediu dica agora en siet ocasions a comparecencia d’o president espanyol en o congreso, y o PP ha gosau fer uso d’a suya mayoría absoluta pa bloquiar-las todas. A situación, seguntes Rubalcaba, fa menester un cambeo d’estratechia, y os socialistas han pasau de ‘demandar a comparecencia’ a ‘actuar’ pa forzar-la. ‘Hemos demandau siet vegadas a comparecencia d’o sinyor Rajoy, y la demandaremos una uitena porque queremos que vienga a la camara pa decir-le que ha de dimitir’, ha dito.

Menaza de moción de censura

En iste marco, Rubalcaba ha alvertiu que si o PP tornaba a negar a comparecencia de Rajoy presentaría una moción de censura, que ‘en realidat ye una moción por a dignidat d’ista camara pa que podamos debatir y votar’. Diz que no lo fa pa fer cayer a Rajoy por ista vía, sino pa defender a ‘dignidat’ d’o congreso. Seguntes Rubalcaba, se tracta de poder ‘debatir en o pleno d’o congreso’, pero no si i hai atro dirichent d’o PP que lo pueda substituir, que ‘ye a suya responsabilidat’, sino ‘si iste president d’o gubierno puede continar u no’. ‘Sé que ye en os limites d’o Reglamento, lo sé, pero tos digo que o gubierno, con o suyo bloqueu a ista camara, no nos ha deixau atra solución, y ye un problema de dignidat parlamentaria, que ye tanto como decir de dignidat de sobiranía popular’.

‘No tenemos fuerza parlamentaria pero sí moral’

Una vegada mas, Rubalcaba ha feito alcordanza que a oposición no teneba ‘fuerza parlamentaria’ pa cambiar o gubierno d’o PP u pa convocar eleccions, pero ha dito que sí que teneba ‘fuerza politica y moral’ pa ‘exichir a Rajoy que ha de fer un servicio a Espanya y dimitir’, porque ‘as suyas hipotecas en iste momento lo inhabilitan’.

Fuent: http://www.vilaweb.cat/noticia/4134098/20130716/rubalcaba-presentara-mocio-censura-rajoy-compareix.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.