Rudi presenta 400 midas con as que pretende amillorar o sistema sanitario

A “visita sola”, o control de l'absentismo laboral u o reforzo a pacients dependients son bellas d'as proposas.

Luisa Fernanda Rudi en a Presentación d'as midas sanitarias. (Foto: aragonhoy.net)

A presidenta d’o Gubierno d’Aragón, Luisa Fernanda Rudi, ha presentau l’analís d’a situación existent en l’ambito sanitario aragonés, o diagnostico d’a suya situación y as midas a prener ta encarar de traza directa, eficaz y eficient os problemas existents. De conchunta con o Consellero de Sanidat, Buenpasar Social y Familia, Ricardo Oliván, y con o director cherent d’o Servicio Aragonés de Salut, Tomás Tenza, ha exposau as prencipals midas que se van a enchegar en a sanidat aragonesa dica o 2015.

Una d’ellas, a creyación d’a “Visita Sola”, en Ficacio Especializau y en as consultas d’alta resolución. “Se tracta d’achuntar en un mesmo día las consultas, exploracións y prebas que s’amenisten t’o diagnostico y encete d’un tractamiento”, ha dito Rudi. Amás, ha quiesto destacar a Presidenta d’Aragón, “se levará a cabo un rigoroso control d’o absentismo laboral, se reforzará o papel de l’equipo de Ficacio Primario en o ficacio a pacients dependients u s’adaptará o sistema sanitario a la tendencia de viellera d’a población”.

“Somos muit conscients que istas midas no tendrán exito si no aconseguimos embarcar en a suya implementación a totz os actors activos d’a sanidat aragonesa y tamién a la resta d’aragoneses”. Rudi ha remerau en a suya intervención que en o suyo Discurso d’Investidura ya anunció a creyación d’uns grupos de treballo dentro d’a sanidat, en os quals se dase voz a os achents que intervienen en o sistema. Grupos que han centrau os suyos estudeos en quatro bloques, o Ficacio Primario, a optimización de recursos, l’autoridat publica d’o medico y o plan de calidat t’a sanidat aragonesa. “Deseyo destacar a importancia d’o treballo de totz os colectivos y entidatz que han participau y han presentau as suyas proposas”, ha dito a Presidenta.

En a Presentación d’as midas sanitarias proposadas por o Gubierno d’Aragón, Luisa Fernanda Rudi ha quiesto destacar que “a reforma d’a sanidat aragonesa que proposa l’Executivo autonomico no se basa en os retalles, sino en chestionar de traza más eficient y eficaz os recursos existents. Sabemos qu se puede fer, como se puede fer y lo imos a fer”.

D’atra man, o consellero de Sanidat, Buenpasar Social y Familia, Ricardo Oliván, ha explicau que “a sanidat aragonesa amenistaba un diagnostico en o qual participasen totz os colectivos implicaus. Con istas midas pretendemos amillorar a sanidat aragonesa y fer-la sostenible. Partíbanos d’una situación que se caracterizaba por una falta de previsión, una chestión manifestament millorable y unas necesidatz que no se veyeban refrendadas por prous recursos”.

Existen quatro eixes estratechicos que guían istas midas y que seguntes o propio Oliván, “tienen o prencipal obchectivo de beneficiar a o pacient”. Os eixes pasan por a necesidat d’ordinar a estructura, amillorar a financiación buscando a eficacia y a eficiencia, aconseguir a excelencia y incentivar a la innovación.

Fuent: http://www.aragonhoy.net/index.php/mod.noticias/mem.detalle/id.109061

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.