Rudi y o suyo gubierno niegan relación con cobros irregulars en o PP

Rudi contesta a una pregunta de CHA negando a suya implicación y a d'o suyo Gubierno en a trama d'os "sobres"

pleno cortz

Foto: Cortes de Aragón

En as Cortz d’Aragón, Luisa F. Rudi ha compareixiu a proposa de CHA en o pleno “ta que aclare a suya presunta implicación, y a d’atros miembros d’o suyo Gubierno, en a trama de cobros irregulars de dirichents d’o Partiu Popular, y o suyo grau de conoiximiento d’a situación, asinas como ta informar sobre as responsabilidatz politicas que va a asumir a o respective”.

Rudi ha considerau que a demanda de comparecencia teneba una “gran dosi de mala intención” pues seguntes Rudi no s’ha prebau a existencia d’una trama corrupta en o PP, amás de que “da por feito a mía implicación u conoiximiento”. A presidenta aragonesa ha advertiu d’as conseqüencias legals d’ista mena de formular as demandas de compareixencia “porque no voi a almitir que imputen a dengún d’os miembros d’o mío Gubierno, ni d’o mío grupo, ni un delito, ni una falta”.

Rudi ha afrimau que no i hai garra relación ni d’ella ni d’o suyo Gubierno con os feitos publicaus en os meyos de comunicación y ha criticau a CHA por a “irresponsabilidat” de pretender “espardir a taca d’o desprestichio sobre a Camara y o PP”. Rudi ha declarau que ha estau clara en relación a criticar episodios de corrupción, tamién en o suyo partiu.

Dende CHA, han demandau que “condene os casos de corrupción politica, baixe a o concreto”. José L. Soro ha comentau que “o que se pregunta qualsiquiera, lechitimament, ye si i habría implicau bell miembro d’o PP aragonés”. Asinas mesmo, ha refusau as parolas de Rudi advirtiendo-les de conseqüencias legals ta venients oportunidatz y ha declarau que a Mesa la admitió y “si tien bell dandalo, actúe, vaiga t’os tribunals, no nos menace”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.