Rusia acceptaría d’atacar Siria si se prueba l’uso d’armas quimicas

Putin diz que nomás o Consello de Seguridat puede autorizar l'ataque militar. O Senau d'os EUA votará un esbruixallo pa dar emparo a Obama

Vladimir Putin (Foto: Biquipedia)

Vladimir Putin (Foto: Biquipedia)

O president de Rusia, Vladimir Putin, no descarta refirmar un ataque militar en Siria emparau por as Nacions Unidas si bi hese prebas obchectivas de que o gubierno de Bassar Al-Assad fació servir armas quimicas. Asinas l’ha dito en una entrevista a Associated Press, en que ha calificau de ridicla a teoría de que as fuerzas gubernamentals emplegoron armas quimicas.

‘Dende a nuestra anvista, ye de raso absurdo que as fuerzas armadas regulars, que se troban en plena ofensiva y que en qualques zonas han acorralau a os rebeldes, haigan empecipiau a fer serevir armas quimicas viedadas quan saben muit bien que fería honra de pretexto pa aplicar sancions y l’uso d’a fuerza’, ha dito Putin. Con tot, ha dito que si bi hese garra dato que constatase l’uso d’armas quimicas por parte d’as fuerzas armadas, no descartaría de refirmar un ataque militar en Siria. Unas prebas que habrían d’estar ‘convicents‘ y presentar-se a o Consello de Seguridat d’a ONU, que a o suyo pareixer ye l’unico que puede autorizar l’uso d’a fuerza militar contra un país soberano.

Entremistanto, o comité de Relacions Exteriors d’o senau d’os Estaus Unius ha alcordau d’autorizar a o gubierno de Barack Obama que ataque militarment Siria. Seguntes The Washington Post, o grupo lechislativo ha redactau un esbruixallo en que autoriza a o gubierno a fer uso d’a fuerza militar contra o rechimen d’Al-Assad. L’ataque s’amugaría a un maximo de 90 días, con un periodo inicial de 60 días prorrogable por 30 días mas con una nueva autorización d’o congreso. O documento tamién vieda o desplegue de tropas en territorio sirio, tot y que sí que contempla o ninvio d’una ‘chicota misión de rescate’ pa casos d’emerchencia.

O texto s’ha pactau dimpués de recibir Obama o refirme d’os prencipals dirichents republicanos y podría estar adoptada hue mesmo, pa pasar posteriorment a consideración d’o pleno.

Fuent: http://www.vilaweb.cat/noticia/4141818/20130904/russia-acceptaria-datacar-siria-prova-lus-darmes-quimiques.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.