S’activa en Archentina o proceso contra os crimens d’o franquismo

Una chueza prenerá declaración a victimas de delitos de lesa humanidat antis de decidir si ordena a extradición de Martín Villa y ueito denunciaus mas

franquistas

Martín Villa, o segundo por a dreita

A unica causa chudicial ubierta en tot o mundo contra os crimens d’o franquismo la instruye a chueza archentina María Servini de Cubría, que ha acceptau a solicitut de querella de decenas de victimas d’a dictadura. A chueza s’ha aveniu a ascuitar a os testigos d’os querellants por vídeoconferencia, pero s’habrán de trigar-ne dotze, que empecipiarán a declarar o 25 d’abril. Una vegada ascuitaus, decidirá si demanda a l’Estau espanyol a extradición de responsables de crimens de lesa humanidat mientres o franquismo, entre os quals ye l’exministro y exgubernador civil de Barcelona Rodolfo Martín Villa.

A causa empecipió en Archentina en 2010 a resultas d’a carencia de progresos chudicials en l’Estau espanyol ta acazar y condenar os crimens d’o franquismo. Entre os denunciaus por delitos de lesa humaintat en l’Estau espanyol entre 1936 y 1977 son, amás de Martín Villa, l’exsecretaire cheneral d’o Movimiento, José Utrera Molina, y o de Treballo, Fernando Suárez González. Os atros querellaus son os exchueces Jesús Cellas Mohedano y Rodolfo Gómez Chaparro; os policías acusaus de torturas mientres o rechimen José Antonio González Pacheco, alias ‘Billy o Nino’, José Ignacio Giralte González, Celso Galván Abascal y Jesús Monyas Aguilar.

Impunidat

O periodista Xavier Montanyà remeraba a semana pasada en un mail ubierto a Vilaweb os crimens de que s’acusa a beluns d’ells. Y se referiba asinas a Utrera Molina: ‘Suegro de l’actual ministro de Chusticia, Alberto Ruiz Gallardón, y miembro d’a Fundación Francisco Franco, estió nombrau, en 1974, ‘ministro secretaire cheneral’ d’o Movimiento por Carlos Arias Navarro, o ‘carnicerito de Malaga’ (…). Mantiene y esfiende que Franco no yera totalitario y creyeba en a democracia, y que ista imachen crudel que s’ha espardiu proviene d’a literatura contraria. Recientment, publicaba en l’ABC un articlo sobre Catalunya en que afirmaba: ‘Me fa mal agora, dimpués de tantos anyos, a criminal actitut d’os actuals gubernantes catalans, que posiblement no pueden remerar tanta chent como conoixié personalment que, con radices catalanas, heba esfendiu dica morir o sentiu d’Espanya, heba nutriu con efectivos numerosos a groriosa División Azula y heba manteniu una clamor de leyaltat quan existiban qualques silencios precursors d’una dolorosa negación.’

Y asinas, de ‘Billy o Nino’ y de Martín Villa: ‘Billy o Nino ye denunciau como torturador en mas d’una dotzena de querellas, y Rodolfo Martín Villa en a d’o caso d’os cinco treballadors muertos a disparos en Vitoria, en 1976, quan yera ministro de Relacions Sindicals. Totz son nombres d’altos responsables d’o rechimen, y a transición ha permitiu que, en democracia, continen vivindo y treballando con impunidat total‘.

Orden de detención internacional

Quan a chueza haiga conversau con os dotze querellants se pronunciará sobre a petición d’encausamiento y orden de detención internacional contra os denunciaus ta que sían extraditaus ta Archentina y declaren debant d’a chueza.

Una d’as advogadas d’a querella, l’archentina Ana Messuti, diciba ahiere que os tres anyos que fa que dura o proceso ha permitiu de patentizar a connexión d’a dictadura franquista con o nazismo. En unas declaracions que destaca o diario espanyol Público, Messuti diz: ‘Tenemos querellando a os familiars d’os quals estioron masacraus en Mauthausen. Quan Hitler preguntó a Franco qué heba de fer con os refuchiaus espanyols que n’i heba en a Francia ocupada, Franco le dició: “no son espanyols, son royos”. Y os exiliaus estioron ninviaus ta iste campo de concentración, a on morioron cinco mil.’

‘O Tribunal Supremo espanyol decidió l’anyo pasau que os crimens franquistas no se podeban chudgar ‘por a vichencia d’a lei d’amnistía, por prescripción, por suposición que tanto victimas como victimarios son muertos, y por o prencipio de retroactivitat d’a lei penal, unas qüestions que nusatros os archentinos conoixemos muit bien porque aquí se diciba o mesmo ta empachar os chuicios a os chenocidas archentinos’, destacaba atro d’os advogaus d’a querella.

Fuent: http://www.vilaweb.cat/noticia/4098314/20130323/sactiva-largentina-proces-crims-franquisme.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.