Salmond y Cameron sinyan un alcuerdo historico t’o referendum escocés

Se ferá en agüerro de 2014. L'alcuerdo s'ha sinyau en Edimburgo

Os gubiernos escocés y britanico han sinyau hue un alcuerdo historico t’a celebración d’un referendum sobre a independencia en l’agüerro d’o 2014. L’alcuerdo l’han sinyau en Edimburgo o primer ministro escocés, Alex Salmond, y o britanico, James Cameron. A calendata d’o referendum ye una victoria d’o SNP, porque a Gran Bretanya quereba que se fese en 2013. Escocia accepta, en cambeo, que o referendum propose una sola pregunta: si os escoceses quieren estar independients u remanir aintro d’a Gran Bretanya.

Ta trestallar o voto d’os partidarios de remanir en a Gran Bretanya, o gubierno escocés quereba que i hese una tercera opción, de demandar mas autonomía. Tamién s’ha alcordau que puedan votar-ie totz os escoceses dende os 16 anyos (y no dende os 18, como ye habitual).

As relacions entre Escocia y Anglaterra tienen mas de tres sieglos d’historia. En 1603 empecipioron a compartir dinastía y, dende 1707, contoron con un solo parlamento, con siede en Londra. En 1999 estió constituyiu o primer parlamento escocés dimpués de quasi 300 anyos, aprebau en referendum.

Entremistanto s’ha sabiu que o portavoz d’esfensa d’o Partiu Nacional Escocés, Angus Robertson, demandará ista semana que o congreso d’o partiu, que se desembolica en Perth, alcuerde demandar que Escocia forme parte d’a OTAN, si esdeviene independient. Os soberanistas escoceses yeran dica agora contrarios a la OTAN, especialment porque no quieren armas nucleyars. Pero agora dicen que, dimpués d’haber-ne charrau con dirichents politicos y militars de Noruega, Dinamarca y Islandia (estaus basicos en a estratechia independentista escocesa), que sería una guarancia ta istos países que Escocia estase miembro d’a OTAN.

Ta calmar a os contrarios a iste tombo politico, Alex Salmond dició a semana pasada que a nueva constitución escocesa viedaría explicitament as armas nucleyars -por a luita d’o SNP mientres muitos decenios contra a base de submarinos nucleyars britanica que n’i hai en o país.

Fuent: http://www.vilaweb.cat/noticia/4047383/20121015/salmond-cameron-signen-acord-historic-referendum-escoces.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.