Salvemos Averly fa un comunicau sobre o espaldo d’a factoría

T'a plataformorma Salvemos Averly a situación creyada por o Concello de Zaragoza leva sin remedio ta l'espaldo de Averly d'o que responsabiliza a Brial, Averly S.A., PSOE, PP y Ciudadans.

“Con dolor y consternación a plataforma Salvemos Averly constata que, lamentablement, tot indica que a concesión d’a licencia d’espaldo leva sin remedio a l’esvoldregue d’Averly. Os tribunals podrán en o suyo día resolver os recursos presentaus pero, gracias a os votos d’o PSOE, PP y Ciudadans, pareixe que o suyo fallo será ya irrelevant, pues ta alavez a factoría habrá deixau d’existir. Os tres partius y as interpresas Brial y Averly han aconseguiu decretar finalment a destrucción d’a factoría.”

“A plataforma Salvemos Averly y as organizacions y personas que’n fan parte s’amuestran de tot argüellosas d’a suya luita terne por a esfensa d’o patrimonio cultural, d’un urbanismo sostenible y compromeso y de l’intrés cheneral. Y deseyan d’agradeixer a la resta d’entidatz y personas que han colaborau en ella d’una traza u unatra. Encara que pueda pareixer extranyo, somos bien felices por haber dau por a comunidat lo millor de nusatros mesmos sin que calese garra contraprestación. Y tamién somos felices d’haber recibiu un aprendizaje imprescindible ta conoixer o funcionamiento de bella esfera de poder. Hemos puesto conoixer, por eixemplo, dica qué punto a construcción d’a ciudat ye sozmesa a inercias especuladeras an que participan partius, tecnicos, interpresas y medios de comunicación, y dica qué punto muitos d’istes zaguers sozmeten tot criterio periodistico a intreses interpresarials. Hemos comprobau tamién a imposibilidat de difundir un mensache sensible a o patrimonio cultural en qualques medios de comunicación quan existen de por meyo intreses urbanisticos. O control ha estau ferrio y a manipulación, terne.”

“Nos hese feito goyo de que en a votación de ahiere Zaragoza en Común y Chunta Aragonesista hesen votau contra a concesión d’a licencia d’espaldo. Tamién nos hese feito goyo que qualques politicos con capacidat d’incidir en l’acción d’o Gubierno d’Aragón s’hesen movilizau ta privar iste resultau. Pero tenemos prou claro que os responsables d’a destrucción de Averly son o Partiu Popular, o Partiu Socialista y Ciudadans. En iste sentiu, refusamos especialment, por cinicos, os malabars y pintacodas realizaus por o PSOE y Cs en as votacions de hue, que, a tamas d’o suyo infantilismo y simplicidat, probablement sían eficaces gracias a la debantdita situación en os medios de comunicación. Prou que penamos por a insensibilidat de Brial y Averly, pero condenamos con mayor rasmia que os tres partius politicos haigan treballau a favor d’os intreses interpresarials en cuenta d’esfender os intreses municipals. En a suya man yera forzar una negociación con a propiedat en termins convenients a o municipio. No lo han quiesto asinas y se’n ha beneficiau a la interpresa.”

Cuanto a l’anterior estau de cosas, a plataforma Salvemos Averly ha alcordau una politica d’accions que, en relación con Averly, afecta tamién a las organizacions que’n fan parte. Dau que s’ha decretau o espaldo y imposibilitau con ixo a salvación de Averly, a plataforma alcuerda:
– Concentrar l’actividat d’a mesma en a consecución d’un Plan Especial ta l’aria de Averly an que a nueva edificación respecte as limitacions existents y cumpla escrupulosament con a mas estricta legalidat, fendo servir ta ixo todas as instancias administrativas y chudicials, si calese. Y:
– Encargar a fundición d’una campana, que se denominará “campana de Averly”, que servirá ta fer sentir a esfensa d’o patrimonio cultural y levará gravada en a suya superficie los nombres de totz os concellers d’os tres partius que han condenau Averly a la destrucción.

Asinas mesmo, a plataforma Salvemos Averly anuncia que en caso de que o Tribunal Superior de Chusticia d’Aragón anule a catalogación actual de Averly y accepte o recurso de Apudepa, a plataforma solicitará l’asunción d’as responsabilidatz que pertoquen, de toda mena, y, entre ellas, a satisfacción d’indemnizacions a favor d’as institucions y a sociedat aragonesa por a destrucción d’un patrimonio cultural fundamental.

Con caracter instrumental, a plataforma ha preso as siguients decisions:
– Aprestar una campanya de micromecenazgo ta financiar os obchectivos antes resenyaus.
– Confiar de tot en os equipos churidicos as decisions sobre os diversos procesos ubiertos.
– Informar sobre los abances de tot ixo a traviés d’os retz socials y d’as canals propias. Cuanto a isto, debant d’o que consideramos malas practicas, a Plataforma no atenderá a os medios de comunicación, fueras d’aquells casos an que pueda intervenir en directo. Solicitamos sincusas a os medios de comunicación que informan librement y rogamos que, si lo consideran, se faigan eco d’a información suministrada en as propias canals.

“Asinas mesmo, con anterioridat a la votación a plataforma desaconselló o voto ta aquells partius que votasen en contra d’empachar l’espaldo de *Averly. Consello que, coherentment con l’anunciau, mantenemos.”

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.