S’amana una nueva edición d’o Festival “Esfendemos a tierra” en Artieda

O tradicional festival celebrará a suya seisena edición con un ixambre de conciertos y actividatz

cartelartiedaO concello d’Artieda, chunto a l’asociación Aturando Yesa y o Bloque Independentista de Cuchas, son parando os zaguers detalls pa una nueva edición, a seisena, d’o Festival d’Artieda 2013 – Esfendemos a tierra, que se realizará entre os días 19, 20 y 21 de chulio, tenendo como punto central o lugar d’Artieda y a suya luita contra o recreiximiento de Yesa sin xublidar-se d’atras luitas ambientals existents en Aragón y difuera.

O plato fuerte serán os conciertos que entre viernes y sabado se podrán ascuitar en a localidat prepirinenca. O viernes i tanyerá a colla castellana Rojo Cancionero y Banderas Rotas, que ya conoixen o festival y que i tornarán con as suyas cantas protesta. A Gargalé dende Andorra trahierán ta Artieda o suyo rock choven. Dimpués d’o concierto i habrá puesto pa Dj’s (Dj Vaca y Pollo y Dj La Llitera Tropical y Cangrejera).

O sabado continará a mosica con l’actuación de cinco collas mas. Proyecto Hombre, con o suyo mezclallo punk-hardcore-metal dende Zaragoza; Diablo Cojuelo, venius dende Madrit, que ufrirán una fusión de ska, punk y reggae con instrumentos tradicionals castellanos; Atzembla, dende o País Valenciano, i levará o suyo rock con instrumentos tradicionals a os asistents a o festival; Prau, mitica colla aragonesa y en aragonés de fusión de rock con diferents instrumentos tradicionals, y que contina con a presentación d’o suyo nuevo disco “Os pietz en a tierra”; y tamién con rock y gaiters, una d’as collas mas asperadas, Los Draps, dende o Matarranya, dimpués de anyo y medio de l’anuncio d’a fin d’a suya actividat mosical, tornan t’os scenarios, como siempre levando o catalán como luenga prencipal en as suyas cantas.

Pero no nomás i habrá puesto p’a mosica, tamién o sabado de maitins se ferá charradas dende as 11 h., chentas populars (sabado y domingo) a las 14 h., bingo mosical a las 16 h., una cursa t’as obras d’o recreiximiento de l’entibo de Yesa y pintau de murals a las 17 h., y dimpués pasavillas con Ixera Companya Almugavar, y correfocs con Bocs de Can Rosés dende Barcelona.

Pa ir-ie, s’habilitará un autobús dende Zaragoza que ferá aturada en atras localidatz en o suyo camín enta Artieda. I habrá un bono especial pa autobús, chentas y concierto.

Pa mas información: http://esfendemosatierra.info/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.