San Domino, a “isla gay” d’a Italia faixista

O rechimen de Benito Mussolini confinó a decenas d'homosexuals en una prisión en o mar Adriatico, agora en fa setanta y cinco anyos

san dominoA isla de San Domino forma parte de l’archipielago d’as Tremiti, en o mar Adriatico. Amán d’a ciudat italiana de Foggia (Pulla), ye un destín turistico de verano. Pero fa setanta y cinco anyos, iste chicot paradiso turistico estió un infierno ta bella chent. O rechimen faixista de Benito Mussolini, exaltador d’a virilidat y a masculinidat de l’hombre italiano, recluyó en ista isla a un centenar de gays y transexuals, denominaus despectivament ‘decheneraus’ y ‘pederastas’, ta deseparar-los d’una sociedat a on a homosexualidat yera inconcebible.

A historia d’a prisión de San Domino ha pasau inadvertida entre muitos anyos, tot y que i ha habiu chent que la ha estudiada. Ista semana, con ocasión d’o setanta y cinco cabo d’anyo d’o establimiento d’o campo de reclusión, una larga lista d’entidatz en favor d’os dreitos d’os homosexuals s’han dirichiu ta fer homenache a qui i estioron confinaus.

Como explica iste amplo reportache que adedica a BBC, a paradoixa ye que beluns d’os recluius por as autoridatz faixistas experimentoron en San Domino una cierta liberación en o sino d’una comunidat ubiertament homosexual, tot y estar baixo rechimen penitenciario.

Una buena parte d’os engarcholaus en l’archipielago yeran homosexuals de l’aria de Catania, a resultas de l’encerrinamiento d’un prefecto de policía que imposó aturar ‘a espardidura d’a decheneración’ en Sicilia y en 1938 ninvió quaranta y cinco hombres a San Domino, a seicientos kilometros de casa suya.

Fuent: http://www.vilaweb.cat/noticia/4124937/20130614/san-domino-lilla-gai-italia-feixista.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.