Sangüesa acullirá una atra manifestación contra o recreiximiento de Yesa

Os eslizamientos de laderas facioron desaloixar bellas casas de Yesa fa bells meses

cartelA oposición t’o recreiximiento de l’entibo de Yesa ye creixendo más encara dende os movimientos d’as laderas que bi ha habiu en os zaguers meses y dende que o experto en cheolochía Antonio Casas diese a voz d’alarma y recomendase desaloixar Sangüesa por seguridat en una comparecencia en as Cortes d’Aragón o pasau 21 de mayo.

T’amostrar iste refús t’as obras, os opositors ta l’entibo han organizau una chornada con charradas y diferents actos, que rematarán con una manifestación que saldrá a las 18 horas d’o centro d’o lugar navarro de Sangüesa. “Queremos emplir as carreras de Sangüesa / Zangoza de chent, mosica y color. Os motivos que nos levan a convocar-la (a manifestación) son muito preocupants y por ixo queremos que a respuesta d’os nuestros vecins y conciudadans siga contundent. Y nos fería goi que istos organismo que nomás preban de fer-nos servor t’as suyas propias fins, plenos d’intreses amagaus y que no nos deixan que un esdevenider gris, nos sientan y veigan. Alto y esclatero, protestando contra o suyo barrenau prochecto por un esdevenider millor, más chusto, más seguro”, dicen os organizadors en a convocatoria.

De maitins, URA- Nueva Cultura de l’Augua ha organizau en a Casa de Cultura d’o lugar unas “Trobadas de l’augua“, a on que se charrarán sobre conflictos arredol de l’augua en Navarra y se presentarán ponencias arredol de l’entibo de Yesa, y alternativas a lo recreiximiento.

Tamién se ha prencipiau una campanya ta replegar refirmes de representants politicos, sindicals, culturals, …ta que se i embrequen con a suya sinyatura y asistencia t’os actos. A organización ha animau a los manifestants a que vaigan portiando obchectos “que puedan fer honra ta poder flotar y mover-nos en l’augua con libertat.” Debant d’o periglo de l’entibo, quieren que a manifestación siga “a unica marea sobre la que vaigamos a esnavesar estando en Sangüesa”.

T’a manifestación s’aspera que vaiga chent d’a redolada de l’entibo y d’os lugars afectaus, pero tamién atras personas solidarias dende atros puestos más grans como Chaca, Samianigo, Pamplona, Uesca u Zaragoza. Dende ista zaguer ciudat se ye organizando antimás un autobús ta ir t’a manifestación que saldrá a las 12 d’o maitin d’o Paseu María Agustín. Os viaches se pueden mercar en a tabierna A flama, en a carrera Mayor.

Se puet trobar más información sobre os actos y a organización en a web de l’Asociación Río Aragón.

 

Una rispuesta a Sangüesa acullirá una atra manifestación contra o recreiximiento de Yesa

  1. Pingback: Zangoza acullirá una atra manifestación contra o recreiximiento de Yesa | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.