Sanidat para una estadistica incompleta sobre violencia de chenero

Nomás incluirá en o recuento de feridas a las mullers que haigan permaneixiu ingresadas en un hespital a lo menos 24 horas, que son una minima parte d'o total de victimas

ARAnaMato_02_tn496x3291

A ministra Ana Mato. Foto: Gubierno d’Espanya

En 2012, 52 mullers estioron asasinadas por violencia de chenero y, en o que levamos d’anyo, atras 28 n’han estau victimas d’a mesma muerte. Pero, quántas mullers sufren en Espanya violencia masclista? A estadistica nomás replega os casos en os quals a final ye l’asesinato, pero brenca diz sobre a resta de victimas. O Ministerio de Sanidat para agora una nueva estadistica que, manimenos, tamién quedará incompleta: solament replegará os casos en os quals as mullers han quedau tant grieus que amenisten un ingreso hespitalario de, a lo menos, 24 horas. Asociacions y expertas avisan que se tracta de nomás uns pocos casos y que un rechistro a medias puede estar contraproducent.

Dica agora, os datos, tanto d’o Ministerio de Sanidat como d’o Consello d’o Poder Chudicial, replegan, por un costau, as denuncias y, por atro, os casos de mullers asasinadas: edat y nacionalidat d’a victima y agresor, puesto y calendata de l’asesinato, si i heba denuncia de por medio y bella mena de mida cautelar, asinas como atros detalls d’o caso. En os zaguers meses, a ministra Ana Mato ha anunciau qualques cambeos, como o d’introducir os casos de menors asasinaus y de ninos que quedan popiellos. As estadisticas d’o Ministerio de Sanidat ya replegan istos datos.

Mato tamién anunció o cabo de 2012 que enamplarían a estadistica pa incluir-ie a las mullers feridas por violencia machista, y no nomás a las asasinadas. Manimenos, o prochecto que finalment i hai sobre a mesa solament incluye a las mullers que as suyas lesions les faigan permaneixer en un hespital a lo menos 24 horas. Un portavoz d’o Ministerio asegura que se tracta d’enamplar a estadistica “china-chana” y subraya que, dica agora, a información sobre as feridas nian se replegaba: “En mullers feridas u lesionadas partimos de zero, no i heba mica, se tracta de dar un trango. I hai voluntat que, mas entabant, se’n den mas”.

Pero asociacions y expertas qüestionan que ixe trango vaiga a aportar bella cosa positiva. Mas bien a o contrario. “Puede estar contraproducent. Ye bien ir recopilando datos, pero en istos momentos, quan no i hai una estadistica mas cheneral, acudir a casos tant concretos puede inducir a error sobre quál ye a grandaria real d’o problema y contribuir negativament a la forma en a quala se fa vistera a violencia de chenero”, explica Yolanda Besteiro, presidenta d’a Federación de Mullers Progresistas.

Besteiro subraya que os casos que requieren una hespitalización d’a lo menos 24 horas “son muit pocos”. “O normal ye que no la requiera u que sían unas horas. Pienso, por eixemplo, en un brazo trencau, en contusions, en os danyos psicolochicos…”.

“Nian o Codigo Penal requiere a hespitalización pa considerar una lesión como grieu u muit grieu. A hespitalización y a gravedat no siempre son relacionadas”, apunta Marisa Soleto, directora d’a Fundación Mullers, pa qui enamplar a estadistica ye positivo si s’incluyen a todas as mullers con bella mena de lesión. “A nuestra estadistica se basa muito en qüestions chudicials y en o numero de mullers asasinadas, que no deixa d’estar un universo relativament chicot y no refleixa bien o fenomeno global, asinas que ye bien si s’estendilla a todas as mullers supervivients, pero chenerar indicadors parcials ye imprudent, seríanos fendo vistera solament una parte muit chicota d’o problema y minimizando-lo”, diz.

Soleto recuerda, amás, que o Poder Chudicial ya replega as denuncias por violencia de chenero que se fan a traviés d’os partes de lesions: en 2012 n’estioron 14.743, l’11,4% de todas as denuncias que se rechistroron por violencia machista.

A presidenta d’a Comisión pa la Investigación de Malos Tractos a Mullers, Susana Martínez Novo, tampoco no considera adequau iste cambeo. “Aparentment quanta mas información se’n replegue, millor. Pero con a forma en a quala l’han planteyau se corre o risque que se minimice y invisibilice a gran mayoría d’os casos de violencia de chenero, que no amenisten asistencia medica prolargada ni tractamiento cirurchico. D’astí a que no se consideren violencia de chenero i hai solament un trango”, asegura Martínez Novo, que no entiende por qué establir una muga de 24 horas d’hespitalización pa estar incluida en a estadistica.

Proposición no de lei

O PSOE ya ha anunciau que presentará una proposición no de lei en o Congreso “pa guaranciar que a estadistica sía fiable y refleixe toda a realidat, sía como sía”. A secretaria d’Igualdat d’o PSOE, Purificación Causapié, ha asegurau que a estadistica, tal como la planteya o Gubierno, “ixublida a o grueso de victimas que padeixen malos tractos y que paten agresions de distinta gravedat, faltadas, menazas u maltracto psicolochico”. “Solament fendo vistera a violencia de chenero podremos combatir-la. D’astí a importancia d’as estadisticas y de qué mena d’información se disposa”, ha sinyalau.

Fuent: http://www.eldiario.es/sociedad/Sanidad-prepara-estadistica-incompleta-violencia_0_156434546.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.