Sant Chuan de Plan recupera es suyos costumbres con el Diya de la Cultura Chistabina

Como totz es anyos, Sant Chuan de Plan se viste de gala ta cilebrar el Diya de la Cultura Chistabina, la Falleta y la fiesta de Sant Chuan

Foto: Mila-san (CC-BY-SA)

Foto: Mila-san (CC-BY-SA)

Sant Chuan de Plan cilebrará dende manyana 21 hasta’l diya 24 el XVIII Diya de la Cultura Chistabina, La Falleta y la fiesta de Sant Chuan. Mientres estes diyas, es antigos costumbres, danzas y traches de la val recuperarán el protagonismo que mas d’antes van tenir, pretendendo que no desapareixca.

El diya 21, es vecins de’l lugar se vestirán con es suyos traches tradicionals que se van fer servir ta toda ocasión y epoca, fendo un pasavillas a las 11:30 h. dende la Pza. Mayor hasta la zona esportiva d’El Regancho a on actuará El Corro d’Es Bailes, que farán danzas populars como la danza d’es Mayorals u el baile de las Flors. Contino se fará la chenta popular.

Tamién mientres este diya se cilebra la III Trobada d’artesanos chistabins an que se podrá vier productos artesanals de la val asinas como una demostración de cómo se va teixer antesmas la lana.

Músicos del País (M.D.P.) tanyerán dimpués de chentar, asperando de nueitz, a las 22:30 h. el concierto de’l grupo Royo Choto Chilindrón, ta continar a las 0:30 h. con la discomobil Vértice.

El Diya de la Cultura Chistabina fue recuperau y empentau per las mullers de Sant Chuan de Plan.

La nueit de’l lunes 23, solsticio de verano, ye el turno de la Falleta. Es vecins enchegan una chera en Planeta la Falla, n’o mont de Sant Mamés. La tradición ye baixar con las fallas enchegadas dende este mont hasta’l río, y dende allí se fará una corrida hasta’l fosal, puesto an que farán cremar una chera. Es zagals y zagalas farán una parrillada aprofitando a chera n’o mont hasta que amaneixca.

Ya a l’atro’l diya, Sant Chuan, ye a fiesta en a localidat, empecipiando con una misa en honor de Sant Chuan Baptista ta continar con un socalce feto pe’s mozos y mozas de Sant Chuan. Es mayordomos y mayordomas farán una ronda per las casas de’l lugar, y de tardes y nueitz tanyerá la orquesta Dragons.

Totz es actos son paraus pe’s mayordomos y mayordomas de’l lugar.

Una rispuesta a Sant Chuan de Plan recupera es suyos costumbres con el Diya de la Cultura Chistabina

  1. Pingback: Sant Chuan de Plan recupera es suyos costumbres con el Diya de la Cultura Chistabina » AraInfo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.