Santisteve y Echenique denuncian incumplimientos d’o Executivo de Lambán con a ciudat de Zaragoza

Totz dos representants han alcordau a creyación de equipos conchuntos de treballo

Pedro Santisteve, alcalde de Zaragoza, ha manteniu hue una nueva reunión de treballo con Pablo Echenique, secretario cheneral de Podemos Aragón y president d’o suyo grupo parlamentario en as Cortes. L’obchectivo yera abordar os incumplimientos que consideran acumula o Gubierno d’Aragón respective a la capital aragonesa, conoixer de primera man los abances en a negociación arredol d’a Lei de Capitalidat y abanzar en as politicas socials que, seguntes o pareixer de Podemos y Zaragoza en Común, han de reflectjar os proximos presuposaus de todas dos institucions.

En a trobada s’han abordau qüestions de importancia t’a capital aragonesa como l’empento a la Lei de Capitalidat, o cumplimiento por parte d’o Gubierno d’Aragón d’o pago d’a deuda contraída con o Concello de Zaragoza y o mantenimiento y enfortimiento d’as politicas socials tanto en l’ambito municipal como en l’autonomico. Ta ixo, Santisteve y Echenique han alcordau a creyación de equipos conchuntos formaus por representants de todas dos formacions, que mantendrán os primers contactos en as proximas semanas.

Entre a reunión, Santisteve y Echenique han recordau que o president d’o Gubierno d’Aragón, Javier Lambán, se comprometió a quitar abance a Lei de Capitalidat entre o primer semestre d’o 2016, un instrumento que servirá ta dotar economicament de una forma adequada os distintos servicios y competencias impropias que ampra a ciudat de Zaragoza.

D’o mesmo modo, os liders de todas dos formacions han sinyalau que o consellero de Ficienda, Fernando Gimeno, tamién se comprometió a o pago d’a deuda d’o tramvía de 2015, que asciende a 15 millons. Ista deuda se suma a la d’os exercicios anteriors 2014 y 2013, que l’Executivo de Luisa Fernanda Rudi no asumió.

En iste sentiu, Santisteve y Echenique han exichiu a os actuals responsables d’o Gubierno d’Aragón que cumplan con as necesidatz d’os zaragozans y zaragozanas que no atendioron executius anteriors.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.