S’apreba a lei de no luengas

PP y PAR sacan d'a lei de luengas os nombres d'as mesmas, a tamás d'a oposición d'a resta de partiu politicos y de tot lo mundo academico y filolochico

Cortes d'Aragón

Cortes d’Aragón (Foto: Archivo d’as Cortes)

O guión fue como yera previsto y o gubierno refirmau por o Partiu Popular (PP) y o Partiu Aragonés (PAR) ha aprebau con os suyos votos a modificación d’a Lei de emplego, promoción y protección d’as luengas propias d’Aragón, conoixida en ista versión como lei de no luengas, en no reconoixer por o suyo nombre a existencia de garra atra luenga que no siga lo castellano.

Dimpués d’una charrada de Maria Jose Ferrando, a coordinadera d’a ponencia d’a lei, a on que detalló o proceso que siguió ista, ha plegau o turno d’a oposición, representada por PSOE, CHA y IU. Todas as collas han charrau d’o “ridiculo” que se yera fendo en tot lo mundo en aprebar-se ista lei, metendo como eixemplo as moflas en o rete por os eufemismos ta no nombrar a l’aragonés y o catalán, y han coincidiu tamién en criticar a la diputada d’o PP por as suyas declaracions y la traza de chestionar a comisión d’a lei.

Maria Teresa Pérez, d’o PSOE ye estada la primer en charrar, remerando que “encara que en Aragón charremos castellano, no somos castellanos” y que “encara que a belún no le faiga goi, se charra catalán y aragonés. Tamién ha feito una esfensa d’a lei de luengas aprebada en 2009 “un texto equilibrau y moderau” frent a o “fanatismo” d’a reforma que hue se ha aprebau. Cuanto a las luengas, ha dito que ye una realidat que se desembolica con toda normalidat” y ha expresau o suyo “Reconoiximiento y refirme t’a chent que l’han furtau os suyos dreitos”.

Chunta Aragonesista ha prencipiau saludando en catalán y aragonés y a suya portavoz, Nieves Ibeas, ha leyiu parti d’o discurso en aragonés. A diputada de CHA ha remerau a oposición de tot lo mundo academico y d’a Universidat de Zaragoza y ha calificau a lei de “escandalo” en o mundo filolochico y scienfico. Tamién ha remerau a oposición, por primer vegada a una lei d’o gubierno, d’o consello escolar d’Aragón. “O numer de fablants no ha d’estar un freno, ha d’estar una enchaquia ta prener midas urchents”, ha dito en referencia a lo chiquet numer de fablants de l’aragonés. Ibeas ha esfendiu que “Tot isto ye ta no nombrar a lo catalán, encara que lo que conseguirán ye amortar l’aragonés“, luenga que seguntes a diputada “morirá sino tien una minima protección. Ibeas ha rematau fendo contimparanza con atros estatutos d’autonomía como o de Castiella y Leyón a on que se reconoix o gallego y o leonés, u l’andaluz, a on que, a tamás de no tener luenga propia, se charra de protecher a traza dialectal d’o castellano. “”No queremos estar o unico pueblo que se retalle a si mesmo os suyos dreitos”, ha adhibiu.

Adolfo Barrena, de Izquierda Unida, ha prencipiau remerando a vada cheneral d’Educación que bi ha convocada hue. A suya formación presentó una lei de luengas alternativa, como ha remerau lo diputau, qui ha acusau a lo PP de “trafucar a mayoría que les dioron, con a capacidat d’imposar”. “Encara somos a tiempo de privar-nos o ridiculo“, ha avisau dimpués de tornar a demandar que no se fese a reforma d’a lei. Ta Barrena, ista reforma “no cumple a constitución, ni l’estatuto d’autonomía, ni a Carta Europea d’as luengas”. “Mesmo lo titol d’a lei ye mentira porque ni proteche ni promociona“, ha adhibiu. Dimpués de charrar breument d’o legau literario y cultural en aragonés y catalán, ha acusau a lo PAR de “no entender que Aragón siga formau por chent diversa”. “Dende l’emplego d’o poder van a estricallar dreitos de ciudadans a qui tamién representan vustés. Aqui [en as Cortz] ye a soberanía d’o pueblo. De tot, no nomás d’o que nomás charra castellano”, ha rematau o diputau de IU.

Dimpués d’a oposición plegaba o turno d’os dos partius que han esfendiu a lei de no luengas: PAR y PP. María Herrero (PAR) ha esfendiu que o suyo partiu no ye “anticatalanista, ye aragonesista” y que a lei de no luengas “no ye una lei contra o catalán, ni contra o valenciano ni lo mallorquín”.  “L’anterior lei trencaba la sociedat aragonesa y concaraba a los aragoneses”, cosa que seguntes a diputada no fa ista lei que “ye sumament respestuosa con as luengas aragonesas” Herrero ha basau os suyo discurso en que “Os territorios d’a Corona Aragonesa comparten una radiz lemosina en a suya luenga” y en que en “a luenga no ye nomás una qüestión de filolochía”. T’a diputada d’o PAR “bi ha teorías lingüisticas diversas y concaradas”. Herrero ha reconoixiu que o LAPAPYP “ha pagau o pato” en ista lei y s’ha preguntau si “existiba Catalunya u o catalán quan se prencipiaban a charrar as luengas que se charran aquí”.

Maria Jose Ferrando (PP) ha prencipiau a suya charrada anunciando que refusarían todas as esmiendas d’a oposición y que a suya colla parlamentaria heba “atendiu a los criterios d’os expertos en filolochía y a l’ALEANR. Ha dito que a chent d’a Francha clama tamaritá, lliterá, etc.. a lo que charran “ta distinguir-las d’o catalán y sentirs-se más aragoneses”. Cuanto a l’aragonés, que siempre l’ha clamau “fabla”, ha dito que l’ansotano y o belsetán yeran quasi desapareixius y que en “a resta d’a provincia de Uesca no quedan que parolas sueltas”.  A diputada creye que no bi ha intrés en l’aragonés en no cubrir-se as plazas d’os estudios de Filolochía aragonesa impartius en o Campus de Uesca, y crei que l’anterior lei yera ta colocar a la chent de CHA y ta satisfacer as anglucias expansionistas de ERC (Esquerra Republicana de Catalunya). Ferrando a tornau a argumentar o granizo malfurrie que suposaría haber acceptau as esmiendas de PSOE, CHA y IU, sin alportar a documentación a on que s’alazeta ixa afirmación y ha dito que a nueva lei . “libera a los aragoneses d’a imposición de charrar lo que no charran y de sentir lo que no sienten y priva o malfurrie”

En o turno d’explicación de voto, IU ha acudau a PAR y PP de fer valer nomás criterios economicistas en no reconoixer os dreitos d’as minorías. Ibeas, de CHA, ha aclariu a Ferrando que “no charra fabla, charra aragonés” y ha acusau a o PP y o PAR de “encerrinar-se en que no se nombrasen as luengas escachando os dreitos de muitos aragoneses”. A portavoz d’o PAR ha dau a norabuena t’os fablants de “l’aragonés d’o norte y l’aragonés de l’este”. Ferrando ha cerrau o turno decindo que o catalán yera una luenga “de difuera” y que l’aragonés ye “feito a micazas”. A diputada ha dito levar muito tiempo en Uesca y “sería a primer vegada que ascuito una charrada en fabla (sic). Maria Jose Ferrando, chunto con Nieves Ibeas, ye a unica que ha feito servir l’aragonés, en leyer un texto en aragonés grausino ta refirmar os suyos postulaus, en o turno d’explicación de voto.

Con ista lei despareix o nombre scientifico d’as dos luengas propias d’Aragón, aragonés y catalán, ta denominar-se eufemisticament, Luenga Aragonesa Propia de l’Aria Pirinenca y Prepirinenca (LAPAPYP) y Luenga Aragonesa Propia de l’Aragón Oriental (LAPAO) respectivament. O gubierno coincide asinas con as tesi de colectivos como FACAO (Federación d’Asociacions Culturals de l’Aragón Oriental) y a Plataforma No Hablamos Catalán (PNHC), qui tienen una fura carga politica anticatalana. Manimenos se concara con tot lo mundo academico y universitario, qui refusa istos terminos y reconoix sin problemas dende fa decadas a las luengas por os suyos nombres. O rete se’n fació a mofla mientres os diyas d’antis d’o debat en Cortz, plegando a estar #LAPAO trending topic. Iste chueves tornaba a estar-ne. En a nueva lei, o nombre d’a luenga charrada en cada municipio podrá decidir-se  en o concello suyo, con o voto a favor de dos tercios d’os concellers, atendendo a “razons historicas y culturals”, sin nian nombrar-se os criterios filolochicos.

En atras dembas, fa desapareixer o Conselllo Superior d’as Luengas d’Aragón, organo creyau por l’anterior Lei de Luengas t’aconsellar a lo gubierno en demba lingüistica. O CSLA tamién teneba como función proposar os nombres d’os academicos d’as dos academias creyadas por a lei, una ta cada luenga. Manimenos, a reforma fusiona as dos academias en nomás una “Academia Aragonesa de la Lengua”.

O trango feito hue en as Cortz ye parti de toda una politica de negación d’a existencia de l’aragonés y o catalán como luengas en Aragón y d’os dreitos d’os suyos fablants. Fa bells meses se conoixeba que os premios Arnal Cavero t’a literatura en aragonés y Guillem Nicolau t’a literatura en catalán, convocaus por a D.Ch.A. todas las anyadas se fusionarían en nomás un0 y que no tendrían reconoiximiento economico ni se guaranciaría a publicación d’as obras. Tanto iste premio, como o Miguel Labordeta t’a literatura en castellano se declaroron disiertos en presentar-se-ie nomás dos obras ta cadagún. D’atra man, o gubierno sí que decidió de subvencionar con 500 € a obra “Antolochía Lliteraria en Aragonés Oriental II”, de l’Asociació Cultural Lliterana “Lo Timó”, qui coincide con os postulaus politicos d’o gubierno en demba lingüistica.

Ista lei ya ye fendo historia en muitos aspectos. O Consello Escolar d’Aragón s’ha oposau a ista reforma d’a Lei de Luengas, estando a primer vegada que iste organo s’oposa a un prochecto de lo gubierno. Tamién por primer vegada en a historia, a comisión d’as Cortz que debatiba a reforma d’a lei habió de suspender-se en albandonar-la os representants de PSOE, CHA  y IU dimpués d’as desafortunadas declaracions d’a suya Coordinadera Maria Jose Ferrando.

A lei antimás podría crebar os dreitos lingüisticos de totz os aragoneses, seguntes muitos expertos en leis. Tanto l’Estatuto d’Autonomía d’Aragón, como a Constitución Espanyola protechen os dreitos d’o fablants d’aragonés y catalán. Antimás, o Reino d’Espanya ye un d’os firmants d’a Carta Europea d’as Luengas Minorizatas a on que se reconoixen expresament os dreitos d’as comunidatz de fablants minorizatas y d’a Declaración Universal de Dreitos Lingüisticos d’a UNESCO.

9 Rispuestas a S’apreba a lei de no luengas

  1. Pingback: S’apreba a lei de no luengas | AraInfo | Achencia de Noticias d´Aragón

  2. As declaracions de PP y PAR son de raso sozrealistas… Qui son os tecnicos lingüisticos d’ista chentota?

  3. De nusatros pende que o faszismo no triunfe. Ista lei ye una prebatina de lingüizidio, no ye atra cosa, e quedará ta la istoria como una bergüeña en toz os sentius. Son tiempos ta concarar-se con o faszismo, o poder faszista quiere anular tot o que no consona con o suyo esprito totalitario.

  4. Nadie pone en duda la pertenencia de la Franja a la CCAA de Aragon, y que el idioma que hablan es el catalán, de la misma manera que el aragones es hablado por una parte de pueblos pirenaicos. Otra cosa es nombrar con acrónimos un idioma, lo que demuestra la falta de rigor y lo que es peor inteligencia de parte de la Junta, dejando en ridículo a toda la Comunidad. El verdadero problema de España, no son los nacionalismos periféricos, el verdadero problema es la estulticia de la casta mediática y funcionarial asentada en Madrid. España se hunde, arruinada por infraestructuras cuyo único criterio económico es que pasen por Madrid con un crecimiento a base de pelotazos urbanísticos, con una concentración de poder económico y financiero en la Capital y una administración central vacía de contenido con el único fin de mantenerse en el poder.

  5. El nacionalismo español con su idea basada en el sentir de la capital española no respeta la diversidad, no la entiende y no la quiere entender. Es importante que las personas que hablan aragones, catalan o cualquier idioma tengan conciencia que su idioma es tan valido para la vida moderna como cualquier otro idioma y que luchar por su idioma es luchar por la diversidad, de la misma manera que los seres humanos luchan por la diversidad de especies animales. Como nadie dice que como tenemos en el mundo la ballena azul las demas ballenas se pueden extinguir es importante tener este concepto para con los idiomas. Como ser humano quiero dar mis felicitaciones y las gracias al diario Arredol por luchar por el idioma aragones y por que de esta manera yo tengo la posibilidad de leerlo y aprender. Saludos desde Euskal Herria.

  6. Jordi Cañameras i Gaya

    Aquesta llei aprovada per la coalició PP-PAR és evidentment una llei partidista i anticientífica, fruit del sectarisme i del propòsit d’esclafar les llengües que no siguin el castellà.
    És d’esperar i de desitjar que continuï la lluita per salvar l’aragonès i el català contra els seus enemics, i que aquesta llei tingui una durada escassa, i s’ensorri amb el decadent poder delPP per la impopularitat de la seva ppolítica reaccionària en tot l’àmbit estatal.

    Des de Catalunya una salutació solidària al poble d’ Aragó i a la seva lluita per la seva cultura i identitat contra la prepotència i la ignorància.

  7. M’agradaria saber escriure l’aragonès per poder-vos expressar el dolor que em causa l’aprovació d’aquesta absurda llei, això demostra la poca sensibilitat, el poc amor a la pròpia terra, la renúncia als orígens que fan algunes persones, en aquest cas la coalició PP-PAR, sembla impossible que es pugui renunciar i anorrear fins i tot la llengua pròpia del país, l’aragonès, que es parlava en tot el territori excepte el que els catalans en diem la Franja i que el centralisme espanyol va escombrar fins a reduir-lo a menys de 50.000 parlants.
    El meu sincer condol.

  8. Oriol Ballester

    Salutacions cordials des de Catalunya, orgullosa per sempre d’haver format part del regne d’Aragó.Em fa molta pena això que han fet amb l’aragonès i el català. Ho sento.

  9. Pingback: O Constitucional espanyol debatirá sobre a lei de no-luengas | Arredol | La Franja

Responder a Montserrat Cancelar respuesta

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.