Scientificos aconsiguen creyar un imán d’un solo polo

O descubrimiento podría levar en o futuro a la fabricación de superconductors d'alta temperatura, sin perda d'enerchía

Paul Dirac, un d’os pais d’a fisica quantica, en os anyos 30 d’o pasau sieglo, predició a existencia de particlas con un unico polo magnetico. Scientificos d’o Amherst College, en Estaus Unius, y d’a Universidat d’Aalto, en Finlandia han aconsiguiu creyar en laboratorio imans artificials monopolars. A revista Nature ha dau treslau d’o descubrimiento.

Qualsiquier imán tien dos polos, mesmo si se talla en chicotz trozos u a nivel subatomico (norte y sud). Agora s’ha puesto creyar un imán monopolar en condicions de laboratorio, pero encara no s’ha puesto trobar dengún en estau natural, bien en a nuestra planeta u en o espacio exterior.

O equipo liderau por os fisicos David Hall y Michael Ray, decidió de creyar un campo magnetico artificial chenerau por a condensación de Bose-Einstein a on a temperatura ye quasi cero absoluto. Os atomos en iste caso se comportan de traza quantico-colectiva en cuenta de fer-lo como una unica particla.

Hall ha declarau que “o nuestro metodo pa chenerar un campo magnetico sintetico se ye desembolicando a escape y con o tiempo puede levar a lo desembolique de superconductors d’alta temperatura u de fenomenos fisicos nunca antes vistos“.

O descubrimiento podría levar a fer experimentos en o Gran Colisionador d’Hadrons d’o CERN con a fin de detectar monopolos naturals u a lo menos saber en qué puesto de l’Universo pueden trobar-se.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.