Scientificos catalans descubren cómo s’esparde por l’organismo o virus d’o sida

O descubrimiento ubre a puerta a o desembolique d'una medicina que ature l'abance d'o VIH

Un grupo d’investigadors de l’hespital Hermanos Trias Pujol de Badalona ha descubierto a molecula responsable d’a espardidura d’o virus d’o sida aintro de l’organismo. Isto ubre a puerta a o desembolique d’un medicamento que ature l’abance d’o virus y que, eventualment, facilite una estratechia terapeutica por meyo d’una vacuna. O descubrimiento ye publicau aintro d’a revista internacional PLoS Biology.
O coordinador de l’estudeo, Javier Martínez-Picado, ha explicau que a molecula trobada, clamada gangliosido, permite a dentrada d’o virus aintro d’as celulas d’o sistema immunitario clamadas dendriticas, y ye asinas que reproduce ixe proceso causando a diseminación d’o virus.
En colaboración con l’Instituto de Quimica Abanzada de Catalunya d’o CSIC y d’a Universidat de Heidelberg, en Alemanya, a investigación ha demostrau que “a desaparición d’os gangliosidos inhibe de raso a propagacion d’o virus”, ha explicau Martínez-Picado, acompanyau de l’investigador Bonaventura Clotet.
Y tien tamién constatau que “actualment as terapias antirretrovirals amilloran a calidat de vida, pero no curan, y os pacients cal que sigan tomando medicinas mientres toda la suya vida. A no sanación, ye porque o virus contina replicando-se aintro de bella parte d’o cuerpo.”
Con tot y con ixo, cal prou treballo ta lanzar en o mercau un medicamento que bloqueye a espardidura d’o VIH, que “podría tardar entre 10 u 15 anyos”.
Fuent: http://www.jornalet.com/nova/148/de-scientifics-catalans-descobrisson-cossi-sespandis-per-lorganisme-lo-virus-del-sida

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.