Se constituye o “Pacte Nacional pel Dret a Decidir” en Catalunya

Mas de quaranta entidatz politicas, socials, economicas y culturals han feito a reunión constituyent d'iste organo politico

Pacte Nacional Dret Decidir

Foto: Parlament de Catalunya

Iste mierques o Parlament de Catalunya acullió a sesión constitutiva d’o “Pacte Nacional pel Dret a Decidir“, compuesto por quatro formacions politicas (CiU, ERC, ICV-EUiA y CUP) y unas quaranta entidatz socials, economicas y culturals entre as que destacan l’Assemblea Nacional Catalana (ANC), CCOO, UGT, u a PIMEC (patronal de chicotas y medianas interpresas).

Dimpués de fablar o President d’a Generalitat, Artur Mas, cada entidat ha puesto fixar a suya posición en o pacto, estando dimpués, a sucherencia d’Artur Mas, propuesto Joan Rigol (expresident d’o Parlament) encargau de fer un documento an que se refleixen y unifiquen as diferents posturas. Agora que, s’asperan nuevas incorporacions a o pacto en venients semanas. Artur Mas notificará a celebración y conteniu d’a reunión a o President d’o Gubierno espanyol, Mariano Rajoy, amás d’expresar a suya intención de fer un referendum sobre l’estatus politico d’o pueblo catalán.

Manimenos, i ha habiu bella ausencia destacable, como a d’o PSC, que s’ha sincusau en considerar que o pacto ye un organo de tot independentista, pese a criticas internas por ista decisión. Foment del Treball, patronal catalana, ha refusau o convite, declarando que no yera un acto informativo sino a constitución d’un organo politico. Tampoco no i ha acudiu Arran, organización chovenil independentista de cuchas catalana, que ha sufriu o veto d’o Gubierno catalán en considerar-la a organización chovenil d’as CUP. Manimenos, Arran defiende que no tien vinculación organica con as CUP, tomando o veto como un acto represivo.

Amás d’a constitución d’iste nuevo organo, o 5 de chulio se constituirá una comisión parlamentaria sobre o dreito a decidir.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.