Se constituyen os concellos con sabor a cambio

Pedro Santisteve (Zaragoza en Común) gubernará Zaragoza, Luis Felipe (PSOE) Uesca y Manuel Blasco (PP) repite en Teruel. S'ha sentiu l'aragonés en a toma de posesión de qualques concellers

A nueva corporación municipal de Zaragoza. Foto: Pablo Ibáñez (CC-BY-SA 2.0)

A nueva corporación municipal de Zaragoza. Foto: Pablo Ibáñez (CC-BY-SA 2.0)

O sabado se constituyoron os concellos en a totalidat d’Aragón y d’o Estau do podió viyer-se a color d’o cambio dimpués d’as eleccions locals d’o pasau 24 de mayo.

En Zaragoza, Pedro Santisteve, de Zaragoza en Común fue investiu alcalde en conseguir l’apoyo de 17 d’os 31 concellers (os 9 propios, os 6 d’o PSOE y os 2 de CHA). 10 votos alcanzó Eloy Suárez (PP) y 4 Elena Martínez de Ciudadanos.

A toma de posesión “por imperativo legal” d’os concellers y concelleras de Zaragoza en Común estió marcada por a reivindicación, a luita social y os ideals republicanos. Fernando Rivarés, concellero d’ista formación, churó o cargo en aragonés.

Pedro Santisteve, en recibir o bastón de mando, basó o suyo discurso en as personas y en treballar por realizar un Plan d’Emerchencia Social. Santisteve recalcó que as vecinas zaragozanas serán as que metan dencima d’a mesa as necesidatz d’os suyos barrios. “Cercanía, rendición de cuentas y escuita activa a os vecins y vecinas ye a traza con a que Zaragoza en Común va a fer gubierno“.

Santisteve remató o suyo discurso en aragonésTreballemos a comunal ta un futuro ta totz y todas en una Zaragoza comuna“.

Os nuevos concellers entroron a la casa d’a villa refirmaus por cients de personas a o chilo de “sí se puede” u “sí nos representan”. A plaza d’o Pilar se fació fiesta en salir os nuevos concellers y o nuevo alcalde.

En Uesca, Luis Felipe (PSOE) fue investiu alcalde con os 8 votos d’os suyos concellers, os 4 de Cambiar Uesca y os 2 d’Aragón Sí Puede. A exalcaldesa Ana Alós obtenió os 9 votos d’o PP y José Luis Cadena de Ciudadanos se’n levó os 2 d’o suyo partiu.

En Teruel, Manuel Blasco (PP) ha repetiu como alcalde d’a ciudat en consiguir a mayoría simpla de votos (8) y estar a lista mas votada. A resta d’agrupacions (PSOE, Ganar Teruel, CHA y PAR) votó a os suyos propios candidatos, fueras de Ciudadanos que votó en blanco. Asinas Blasco accede por quartena vegada a o cargo pero sin mayoría absoluta.

L’aragonés se sintió en a toma de posesión de concellers en puestos como Uesca, Andorra, María de Uerva, Quarte de Uerva u Pastriz, amás de Zaragoza, d’a man de concellers de CHA y candidaturas unitarias.

Aquí as alcaldías en atras ciudatz y lugars aragoneses.

Fuera d’Aragón, o cambio politico ent’a cucha se formalizó finalment en diversas ciudatz. En Madrit, Manuela Carmena (Ahora Madrid) aconsiguió a mayoría pa estar alcaldesa y desbancar a Esperanza Aguirre (PP) qui heba ganau as eleccions por un concellero. Asinas finalizan 24 anyos d’o PP en l’alcaldía.

L’activista antidesfiuzamientos Ada Colau ya ye alcaldesa de Barcelona gracias a os votos d’a suya agrupación, Barcelona en Comú, ERC, PSC y un voto d’os tres d’as CUP.

Joan Ribó ye l’alcalde de Valencia gracias a o sí a la suya investidura por parte de Valencia en Comú, PSPV y Compromís, que han desaloixau dimpués de 24 anyos a Rita Barberá (PP).

Dimpués de 16 anyos, UPN pierde l’alcaldía de Pamplona en favor de Joseba Asiron (EH Bildu) que contó con o refirme de Geroa Bai, Aranzadi y Izquierda-Ezkerra, amás d’o suyo partiu. Se vivioron momentos de fiesta en a plaza d’o concello en estar trigau Asiron.

As Mareas Atlanticas d’unidat popular alcanzoron as alcaldías d’A Corunya, Ferrol y Compostela, que ostentarán Xulio Ferreiro, Jorge Suárez y Martiño Noriega respectivament.

En Cadiz, José María González (Cádiz Sí Se Puede) sacó l’alcaldía a Teófila Martínez dimpués de 20 anyos con o refirme de PSOE y Cádiz en Común. Tamién se vivioron momentos de fiesta fuera d’o concello.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.