Se muere o pai d’o zorz

Douglas Engelbart presentó en 1968 en publico o primer zorz d'ordinador. Quereba cambiar a traza d'interactuar con os ordinadors

engelbartL’incheniero norteamericano Douglas Engelbart (Portland, 1925), visionario y inventor d’o zorz d’ordinador, s’ha muerto ista maitinada a os 88 anyos. Engelbart fació, o 9 d’aviento de 1968, a primer demostración publica d’un invento que cambió a relación d’os humanos con os ordinadors: o zorz. En iste vidio podetz veyer que o primer zorz yera prou mas rudimentario que no os que se pueden mercar en as botigas: yera de fusta, prou gran, quadrau y teneba un unico botón, pero cumpliba sin problemas a función de levar o cursor a qualsiquier racón d’a pantalla.

Quaranta y cinco anyos de zorces

D’aquell primer zorz ya en fa quaranta y cinco anyos. Engelbart quereba que os ordinadors aduyasen a os humanos a estar mas intelichents, eficients y productivos, y a suya investigación s’endrezaba enta ista dirección en una epoca en que a mayoría de chent pensaba que os ordinadors solament serviban pa procesar operacions matematicas complicadas. A la presentación que fació en 1968 en Sant Francisco (veyetz-la en vidio), quereba amostrar o funcionamiento de l’Online System (NLS), que permitiba d’usar l’ordinador pa escribir y editar textos facilment, preveyeba a colaboración en ret y as vidioconferencias, feba uso de l’hipertexto y incluiba un obchecto muit extranio que denominó zorz (‘mouse’). Con aquella demostración Egelbart s’abanzó decenios a os ordinadors actuals.

L’inventor d’o zorz estió un visionario, tal como podetz veyer en os vidios d’Invisible Revolution, una web adedicada a documentar as ideyas revolucionarias d’Engelbart. L’incheniero veyeba as posibilidatz d’os ordinadors pa l’uso cutiano quan solament teneban as universidatz, as oficinas d’o gubierno y os centros d’investigación. Treballó en una institución precursora d’a NASA, l’Ames Research Center y s’involucró dende o prencipio con ARPANET, un ret precursor d’internet que lo influenció. Quereba que l’usuario d’un ordinador tenese un control muito mas completo d’ixo que amaneixeba en a pantalla y que se podese relacionar con a maquina d’una traza muito mas fluida. De feito, encara que o primer zorz se presentó en 1968 y a patent se concedió dos anyos mas tarde, Douglas Engelbart i pensaba dende 1961.

O sistema NLS yera muit flexible y poderoso, pero tamién complicau de fer servir, teneba mas de cincocientas combinacions de teclas que serviban pa dar diferents ordens a la maquina y talment por ixo no acabó estando un exito. Pero muitos d’os conceptos d’iste sistema pionero s’han acabau fendo realidat. O zorz d’ordinador en ye un mas y, encara que as pantallas tactils, cada vegada mas comunas, podrían convertir-lo en un radedor en periglo d’extinción, a buen seguro que le quedan muitos anyos de vida.

Fuent: http://www.vilaweb.cat/noticia/4131848/20130704/mor-pare-ratoli.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.