Se presenta en Donostia lo Protocolo pa la Guarencia d’os Dreitos Lingüisticos.

Esfendemos as Luengas y Nogará, entre las entidatz firmants.

Coincidindo con a clausura d’a Capitalidat Cultural Europea de Donostia, los días 16 y 17 d’aviento se celebrarán en a ciudat basca los actos de presentación d’o “Protocolo pa la Guarencia d’os Dreitos Lingüisticos”. En istos actos, lo centenar d’achents socials de toda Europa que han participau en a suya elaboración firmarán iste documento.  Dos entidatz d’a comunidat lingüistica aragonesa son entre los firmants inicials d’o protocolo: Esfendemos as Luengas y Nogará. La ceremonia podrá seguir-se lo día 17 a partir d’as 11:30 por streaming en iste vinclo.

argazki300-php

Cartel de l’acto de presentación d’o Protocolo de Donostia

Lo protocolo ye un documento pensau pa permitir una avaluación obchectiva d’o grau de reconoiximiento y respecto d’os dreitos lingüisticos en una determinada comunidat lingüistica. Pa ixo s’identifican siet ambitos de treballo: Principios chenerals, discriminación y dreitos; Administración publica y institucions; Educación; Ambito socioeconomico; Onomastica; Medios de comunicación y nuevas tecnolochías y Cultura.  En cada uno d’ells se definen una serie de midas necesarias, dica un total de 180, pa garantir los dreitos consagraus en a Declaración Universal d’os Dreitos Lingüisticos y una serie d’indicadors que permitirán a los achents socials avaluar lo suyo complimiento, gracias a un quaderno de seguimiento adaptau a la realidat de cada luenga.

Los promotors d’o Protocolo son lo Kontseilua y la Fundación DSS2016, entidat chestora de Donostia-San Sebastián Capital Europea d’a Cultura. Ista capitalidat, que ista semana remata, s’ha caracterizau por tener en as luengas minoritarias una d’as suyas linias d’actuación, con quantas actividatz que han permitiu visibilizar la situación de l’aragonés y presentar bells quantos prochectos asociativos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.