Se vierten cada diya 300 toneladas d’augua radiactiva dende Fukushima t’o Pacifico

O Gubierno chaponés revela que 300 toneladas d'augua radiactiva arriban ta l'Ociano Pacifico. As midas de contención no fan l'efecto asperau

Foto: Digital Globe (CC-BY-SA)

Central nucleyar de Fukushima-1. Foto: Digital Globe (CC-BY-SA)

O Gubierno de Chapón ha revelau que dende a central nucleyar de Fukushima-1, afectada por un tierratremo en marzo de 2011 que provocó una grau estrafalla nucleyar, se vierten ent’o subsuelo cada diya 1.000 toneladas d’augua dende a central, d’as qualas 300 son radiactivas y que plegan en l’Ociano Pacifico.

Dende o Gubierno chaponés s’asegura que as atras 700 no son contaminadas y que s’acumulan en os soterranios d’os reactors 1 y 4. Fuents gubernamentals y d’a companyía electrica chaponesa TEPCO afirman no saber qué cantidat ha puesto arribar t’o mar, pero consideran que as fugas podioron empecipiar o mesmo momento d’a estrafalla.

Shinzo Abe, Primer Ministro de Chapón, ordenó a o Ministerio d’Industria que meta solución a iste afer medioambiental. Dica agora, a companyía TEPCO se’n feba cargo. A companyía electrica construyó un muro de contención pa evitar que l’augua radiactiva escapase, pero no tenió l’exito asperau.

S’ha planteyau un gastible y compleixo prochecto que planteya a construcción d’un muro chelau arredol de Fukushima-1, impermeable a os vertius radiactivos, encara que ye pendient de l’aprebación d’os diferents gubiernos embrecaus en a chestión d’a esferra. TEPCO entremistanto, prencipiará maitín a bombiar l’augua radiactiva que se troba en os arredols d’o muro de contención construyiu pa evitar que arribe ta l’ociano.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.