Secresto en Kenia de dos cooperants espanyolas

O ministerio d'Afers exteriors ha demandau discreción mientres que diz triballar ta la liberación d'as cooperants

Mapa d'a zona d'o secresto

Mapa d'a zona d'o secresto

Dos mullers de nacionalidat espanyola que yeran treballando en Kenia como cooperants d’a organización Médecins sans Frontières (Medicos sin Buegas) en o complexo de Dadaab estioron secrestadas ahier en o campo d’Ifo, an que opera MSF con uns 8 cooperants internacionals y uns 60 kenians, a cient kilometros d’a buega con Somalia.

Os feitos pasoron ahier día chueves de maitins quan un grupo d’hombres armaus presuntament d’o movimiento islamista radical Al-Xabaab, vinculau a Al-Qaida, atacó dos vehiclos quatre per quatre d’a organización, ferindo lo conductor y marchando-se-ne con as dos cooperants. Una d’ellas ye Montserrat Serra, catalana de Palafrugell y profesora de Tecnolochía en un instituto de l’Escala, que heba demandau excedencia.

De l’atra muller, que ye de Madrid, no se’n ha comunicau a identidat. En l’inte de l’incident, yeran treballando en l’aduya lochistica ta un hespital d’atención primaria an que s’atiende refuchiaus somalís que fuyen d’a guerra, a fambre y a sequera en o suyo país, y miraban d’emprencipiar a ufrir-ie atención secundaria. A ONG, que ya s’ha meso en contacto con as familias d’as secrestadas, ha establierto en Barcelona un gabinet de crisi ta chestionar o causo.

Encara que a policía keniana sospeita que se tracta de secrestadors d\’o grupo islamista Al-Xabaab, un portavoz d’a milicia i ha negau a suya participación. “Tenemos antor d’istos secrestos, pero no en somos os responsables. No las han portadas ta una zona baixo control nuestro”, ha dito un representant d’Al-Xabaab dende Somalia.

O capecero d’a policía rechional keniana, Leo Nyongesa, ha informau d’una estreita vechilancia d’a buega entre os dos países. “Hemos mobilizau totz es oficials y alertau os que son en a buega ta guarenciar que garra vehiclo no salga d’o país enta Somalia. Toda la faixa d’a buega ye sellada”. Seguntes o portavoz d’a policía Erick Kiraithe, un helicoptero d’a Policía keniana y un atro de l’Eixercito se troban sobrevolando a zona ta mirar de localizar as cooperants, encara que pareix que as recias plevidas en a rechión fan o quefer prou difícil. D’entre as zagueras semanas, quantos estranchers en Kenia han sufierto secrestos en zonas amanatas ta la buega con Somalia, an que contina vichent una guerra civil dende 1991.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.