Segunda chornada de vaga educativa en Aragón

Menor seguimiento en ista vaga convocada por CGT y Marea Verda. Un mayestro ha estau deteniu en Zaragoza por negar-se a identificar-se fuera d'un acto a on yera Dolores Serrat

teruel-piquete-info-ARAINFO-TERUEL

Piquete en l’IES Francés de Aranda de Teruel. Foto: AraInfo Teruel

Desigual seguimiento d’a segunda chornada de vaga educativa en Primaria y Secundaria, ahiere diya 15, dimpués d’a vaga d’o pasau 9 de mayo. O sindicato convocant, CGT, chunto a Marea Verda y atros colectivos socials convocó vaga en educación en ixas etapas educativas en Aragón t’o diya d’ahiere, amás d’os diyas 22 y 23 de mayo. A falta de refirme d’atros sindicatos ha baixau o livel de seguimiento d’ista convocatoria que o sindicato convocant calificó de dificil debiu a “o poco tiempo ta parar-la y espardir-la” amás de criticar a tasa cobertura por parte d’os medios de comunicación oficials.

As cifras dadas de seguimiento son d’un 15% d’ature en Zaragoza, un 10% en Uesca y un 7% en Teruel. Manimenos, CGT destaca o zarre total d’o centro de Morata de Xalón y o de Griegos, un 60% de seguimiento en Maluenda, un 65% en Ibdes, un 35% de seguimiento en l’IES d’Utriellas y un 20% en Monzón. En Uesca s’ha feito una “chuflada” por a ciudat, en Teruel i ha habiu piquetes informativos por centros educativos d’a ciudat, y en Zaragoza una manifestación d’unas 1.000 personas ha iu ent’a consellería d’Educación a o chilo de “consellera dimisión”.

Un mayestro deteniu en Zaragoza

detención

Momento d’a detención. Foto: Marea Verda

De tardes se celebraba en o Centro Civico L’Almozara de Zaragoza un acto publico con a presencia d’a consellera d’Educación Dolores Serrat. Marea Verda i ha acudiu, pero a policía nacional espanyola ha negau l’acceso a os miembros de Marea Verda y les ha demandau o desaloixo de l’edificio, menazando con identificacions y sancions en caso contrario. Seguntes Marea Verda, se plegó en un acuerdo en que os integrants d’a marea saldrían de l’edificio pacificament y a policía no identificaría a denguna persona. Manimenos, en salir-ne, s’ha produciu a identificación de dos estudiants, un profesor afiliau a CGT y otri afiliau a STEA. Iste zaguer sería deteniu en negar-se a identificar-se demandando a la policía que cumplise l’acuerdo. O mayestro ha estau ficau en un coche policial debant d’as protestas d’as concentradas. O mando policial ha comentau “yo no he dito que no iba a haber-ie identificacions” y una profesora present ha declarau que a orden d’identificar a o “lider” d’a concentración heba veniu d’instancias superiors seguntes le heba dito un policía. O deteniu estió liberau en a nueit d’ahiere, dimpués de fer-se una concentración en a Chefatura Superior de Policía en refirme.

22 y 23 de mayo, nueva vaga

A semana venient se convocan a dos diyas mas de vaga, o 22 y 23 de mayo. Os convocants consideran que ye “una apuesta fuerte” y cal caminar ent’a vaga indefinida y critican a intransichencia d’a consellería. Tamién destacan a suya disposición a que atros sindicatos y colectivos se sumen a la vaga. De feito, os afiliaus y afiliadas d’o sindicato CCOO refirmoron ir a la vaga, manimenos a dirección se negó a refirmar a convocatoria. Bells afiliaus y afiliadas de CCOO y UGT (que tampoco no refirmó a vaga) demandan a las suyas companyeras que se desafilien d’istas organizacions.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.