Seis nuevas entidatz se suman t’o rete d’economía alternativa d’Aragón

Entre o 3 y o 8 se celebrarán as XVIII Chornadas d'Economía Solidaria con a presencia de todas as entidatz de REAS

Adeban S.Coop, AraInfo Achencia de Noticias d´Aragón, Desmontando a la Pili, La Ciclería, Oshito Audiovisual y Yacarandar Arte y Salud son as nuevas entidatz d’o Rete d’Economía Alternativa y Solidaria (REAS Aragón). Un rete que agora ye formau por 23 entidatz (21 interpresas y 2 asociacions) que promueven una economía a o servicio d’as personas y o suyo entorno. A los productos y servicios ufiertos ya por REAS Aragón se suman agora os que ufren istas seis nuevas entidatz contrimostrando que “atra economía ye posible”.

O perfil d’as nuevas entidatz ye a-saber-lo variau. Adebán, S.Coop naix d’a “experiencia de más de diez anyadas en l’asesoramiento ta interpresas, entidatz autonomos y particulars”, con l’obchectivo de asesorar  y aduyar a montar negocios u chestionar documentos.

Arainfo, antimás de una achencia libre de noticias, que replega, esparde y chenera información, ufre servicios de comunicación, disenyo, desembolique web, audiovisual y formación a traviés d’o prochecto colectivo Mediartika.

Cuanto a Desmontando a la Pili, se define como una “cooperativa de mullers que, a traviés d’os chuguetes eroticos ta ninas grans formentan o consumo responsable mesmo en o leito, t’a pedalear enta atra sexualidat, basada en a diversidat, o respesto, o placer y a salut. Tamién ufren atros servicios como asesoría sexolochica, tuppersex y tallers de sexualidat y autoconoiximiento.

T’os amants d’a bicicleta, a Cilería naix con arrienda servicios y actividatz en o suyo local en a Carrera Palafox: taller d’autoreparación, lavader de bicis, biblioteca, loguero de bicis, cursos de mecanica, cursas, … Tot menau por a Cooperativa Cala y Pedal.

En a demba d’os prochectos audiovisuals i ye Oshito Audiovisual, un prochecto d’autoemplego que tamién ufre servicios de comunidación ta collas de mosica a traviés de Comunica N’Roll, una botiga on-line de artesanía local clamada WhynotGifting Art, y o prochecto Break ItAll, colaboración con TheOtherNet ta hosting, programación y desembolique web.

A zaguer incorporación ye Yacarandar, salud y  arte, qui ufren servicios endrezaus t’a prevención y promoción d’a salut, a rehabilitación y l’atención t’a comunidat. A interpresa ye un espacio ubierto t’a creyatividat, desembolique artistico, bienestar emocional y o contacto interpersonal.

Con istas nuevas entidatz y todas las que ya bi yeran, REAS Aragón ye parando as XVIII Chornadas d’Economía Solidaria, que se celebrarán en Zaragoza d’o 3 t’o 8 de chunio. As chornadas son “un espacio ubierto que preba de fer visteras as iniciativas d’economía alternativa y solidaria existents, enfortir vinclos, trobar nuevas anvistas y fer más facil establir estratechias colectivas, sinerchias y dinamicas de reflexión.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.