S’enampla a ufierta de Formación Profesional

O curso venient bi habrá 10 nuevas titulacions

A consellera Serrat visitando o CPIFP Montaragón o curso pasau (Foto: D.Ch.A.)

A consellera Serrat visitando o CPIFP Montaragón o curso pasau (Foto: D.Ch.A.)

O departamento d’Educación, Universidat, Cultura y Esporte ha anunciau que, dende o curso 2012-2013, prencipiarán a impartir-se un total de diez nuevos ciclos formativos, enamplando asinas a ufierta de Formación Profesional. D’as diez nuevas titulacions, tres serán presencials y las atras siet se podrán cursar a distancia. Todas ellas duran 2.000 horas, ye decir, dos cursos academicos.Se enamplan tamién dende lo curso venient o numer de plazas disponibles. Bi habrá 593 nuevas plazas ta fer un total de más de 25.000 posibles estudiants d’as diferents titulacions de FP. O gubierno, con ista mida, diz “apostar por a Formación Profesional con l’obchetivo d’adaptar-la a la reyalidat productiva y, alavez, a lo que le cal a lo mercau laboral ta que l’alumnalla tienga más facil trobar treballo.

D’os ciclos formativos presencials bi’n ha dos nuevos: Grau Superior en Servicios de Restauración, que se podrá cursar en o CPIFP San Lorenzo de Uesca y en o IES Miralbueno de Zaragoza, y Tecnico Superior en Enerchías Renovables, que se ferá en o CPIFP Piramide de Uesca.

Cuanto a los ciclos que se estudiarán a distancia, de grau superior se creya Educación Infantil en o IES Martínez Vargas de Balbastro; Desembolique d’Aplicacions Multiplataforma en o CPIFP Bajo Aragón d’Alcanyiz; Desembolique d’Aplicacions Web en o CPIFP Los Enlaces de Zaragoza y Laboratorio de Analis y de Control de Calidat en o CPIFP Corona de Aragón de Zaragoza.

De grau meyo prencipiarán en iste curso a poder fer-se a distancia Farmacia y Parafarmacia en l’IES Río Gállego de Zaragoza, Instalacions Electricas y Automaticas en o CPIFP Pirámide de Uesca y Chestión Administrativa en l’IES Tiempos Modernos de Zaragoza y l’IES Sierra de Guara de Uesca.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.