S’enguera a 41ª edición d’o Festival de Cine de Uesca

Prencipia a 41ª edición d'o Festival de Cine de Uesca con a uellada mesa en os curtometraches y Iberoamerica. Se celebrará dica o domingo 16 de chunio

huesca41Iste lunes prencipia a 41ª edición d’o Festival de Cine de Uesca. Ista edición se celebrará dica o venient domingo 16 de chunio por o que será mas curto que anteriors edicions debiu a las retalladas economicas, que tamién han afectau a la supresión de premios y atras arias.

O festival ferá homenache ista anyada a o Centro Universitario d’Estudios Cinematograficos (CUEC) d’a Universidat Nacional Autonoma de Mejico que fa o 50º cabo d’anyo d’a suya fundación, estando a escuela de cine mas antiga d’America Latina y una d’as mas prestichiosas d’o mundo. Amás i habrá tres concursos en a sección oficial: o Concurso Iberoamericano, o Concurso Internacional y o Concurso Documental.

O festival se centrará en os curtometraches y en Iberoamerica y tendrá como seccions destacadas “No se quedan cortos“, una triga de curtometraches colombianos; a sección homenache con curtometraches mejicanos realizaus en o CUEC; a sección “Aragón en el cine” con curtos aragoneses y un documental; “Directores de culto” con o director José Antonio Sistiaga; “Una Mirada Global” parará cuenta en o cine actual en atros países y “Todos los niños al Festival” amanará o cine a os ninos y ninas d’a man de La Linterna Mágica.

O Premio Luis Buñuel s’entregará a o director Adolpho Arrietta, un d’os pioners d’o cine undreground espanyol.

As procheccions y actividatz d’o festival tendrán puesto en a Diputación Provincial de Uesca (C/ Porches de Galicia, 4), Teatro Olimpia (C/ Coso Alto, 40-42) y El Fhosko (C/ Pero IV, 17). E entrada en o festival ye libre, fueras d’a sección “Una mirada global”. A venda d’entradas se ferá en o Casino (Pza. Nabarra, 4) u en o Teatro Olimpia.

Programación d’o festival.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.