S’entra en a tercera semana de vaga indefinida de personal de limpieza en centros sanitarios

Contina aturau o conflicto entre as interpresas concesionarias de limpieza en centros de salut y as suyas treballadoras. O consellero de Sanidat insta a las partes a reunir-se y plegar en un acuerdo

huelga-limpieza-salud

Foto: AraInfo

Contina sin plegar en un acuerdo a vaga indefinida de personal de limpieza en centros de salut y hespitals d’Aragón. O consellero de Sanidat aragonés, Ricardo Oliván, insta a las treballadoras y a las interpresas concesionarias a reunir-se y plegar en un acuerdo, pues considera que “i hai espacios ta ixo”, en especial referindo-se a o Servicio Aragonés de Mediación y Arbitrache (SAMA). O consellero asinas mesmo ha sinyalau que o departamento que diriche no ye actuando con inacción en o conflicto, resaltando que no han de prener partiu por garra d’as dos partes y que o personal en vaga no ye publico.

O conflicto ha viviu hue momentos de tensión en l’hespital Miguel Servet de Zaragoza a on unas cinquanta personas, achustadas por una d’as interpresas afectadas, ha prebau d’entrar en l’hespital. Un piquete ha empachau a entrada d’istas, explicando-les que iste achuste ye ilegal, pues no pueden cubrir-se os puestos de treballo d’o personal en vaga. Ista actuación d’a interpresa ya heba estau denunciada debant d’Inspección de Treballo. Tanto a policía como guardias de seguridat privaus han cusirau o piquete mientres o maitín.

Amás, o pasau chueves tres treballadoras estioron forachitadas d’a interpresa una vegada rematoron a suya chornada como servicios minimos, y a consellería de Sanidat aumentó os servicios minimos dica o 100% en bellas zonas de bells hespitals ta “evitar actitutz d’alto risque” debiu a la vasuera acumulada.

A vaga prencipió o 20 de mayo, y si no se plega un acuerdo antis de chulio, s’aplicaría o convenio d’o sector, por o que as treballadoras habrían d’enfrontinar un aumento d’a chornada con una baixada d’o salario dica o Salario Minimo Interprofesional.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.