S’entregan os premios Recycled Planet Films ta curtos meyo ambientals

S'han entregau dos premios, un d'o publico y un atro d'o churau t'os curtos titulaus "Por encima del planeta" y "Expediente 18.0.8"

Os ganadors d'un d'os premios (Foto: D.Ch.A.)

Os ganadors d’un d’os premios (Foto: D.Ch.A.)

L’Aula de Meyo Ambient Urbano, “La Calle Indiscreta” estió o scenario esleixiu ta fer a entrega d’os premios d’os tallers Recycled Planet Films. Os quatre curtometraches presentaus t’o concurso, feitos por os participants d’iste taller, heban de cumplir dos condicions alazetals: revellar a conciencia y sensibilidat ambiental en o fenomeno d’o cambio de l’orache, y re-emplegar o material bruto rodau por diversos cineastas y realizadors tanto aragoneses como internacionals.

Dimpués de viyer cadagún d’os curtometraches, y una colorida y orichinal votación d’o publico asistent a traviés de globos de colors, s’ha feito a entrega d’o premio d’o churau composau por representants d’o mundo audiovisual y ambiental aragonés. Ixe premio le’n han dau a lo curto “Expediente 18.0.8”.

Iste no ye estau o unico reconoiximiento. Tamién se dió un premio otorgau por votación d’o publico, t’o curto “Por encima del planeta” (Por dencima d’a planeta).

A creyación d’una conciencia ambiental a traviés d’o sieteno arte

Un director d’Estaus Unius de cine independient explicó que “o cine ye una investigación sobre as responsabilidatz nuestras“, y ixe ye en parti o compromís d’o prochecto Recycled Planet Films, que ista anyada fa a suya segunda edición: sensibilizar a traviés d’as imachens, en iste caso, sobre os problemas d’o cambio de l’orache global.

Ista iniciativa, promovida por l’Aula de Meyo Ambient Urbano, “la Calle Indiscreta”, aintro d’o Programa Operativo FEDER 2007-2013, “Costruyindo Europa dende Aragón”, preba de que l’alumnalla, a partir de l’aprendizache de recursos sonoros y visuals, puedan tractar y transmitir os problemas d’o cambio de l’orache global, un d’os principals retos ambientals que concara a sociedat agora mesmo.

Ta ixo, os participants tenioron clases de guión, edición, montache y sonorización. Aintro d’iste taller, y difuera de concurso, s’han feito quatre trailers sonoros promocionals, que se podrán fer servir en bella campanya publicitaria radiofonica.

Os tallers, s’han feito dende 0 20 de noviembre dica o 13 de aviento, y as clases son estadas menadas por profesionals d’o mundo d’o cine y d’a radio. O prochecto s’ha feito en colaborando con a Escuela de cine “Un perro andaluz”, TEA FM y l’Asociación Cultural Ecozine.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.