Ser mosico tradicional

Pepín Banzo

Definir-me como mosico tradicional siempre m’ha chenerau muitos interrogants. Podría considerar-me asinas mientres interpreto melodías consideradas tradicionals, pero alavez quan toco una melodía de composición propia deixo d’estar-ne y paso a estar mosico contemporanio? En cambeo si en soi porque toco instrumentos consideraus tradicionals y  deixo de estar-ne quan emplego por eixemplo, o baixo electrico en as mías execucions? Ista esquizofrenia mental me fa menister prebar de trobar una explicación a tot isto, veyer que ye o que s’entiende por tradicional yprebar d’extrapolar-lo a ixo que entiendo yo por mosica tradicional.

Ta ixo lo primer que cal fer ye partir d’o significau etimolochico d’a parola tradición, que viene d’o termin latín tradere, o que viene transmitiu d’o pasau; ye dicir, o conchunto de conoixencias que cada cheneración entrega a la siguient. Entiendo, allora, que ta que bella cosa se considere tradicional debe existir ixa transmisión en o tiempo, dica aquí tot claro, unatra qüestión será determinar quantitativament quál ye ixe tiempo minimo que amenista bella cosa ta pasar a considerar-se tradicional.

Un aspecto muit important ta parar cuenta ye que ista transmisión en o tiempo no tiene porque succeder d’una traza richida, sino tot lo contrario, a tradición ta estar funcional ha d’estar en constant renovación; se creya, recreya, inventa y amolda diya par d’atro. Alavez, ta mantener-se  viva, se modifica a o compás d’a sociedat. D’aquí chustament, a suya versatil capacidat de cambeo y d’adaptación. Asinas pues, como resultau d’iste proceso d’adaptación constantement surten nuevas formas d’exprisión cultural: nuevas melodías, nuevos instrumentos, nuevos ritmos…

Y ta rematar, unatro aspecto a considerar ye que tot tiene un enceto, una primer vegada y se convierte en tradición mientres un colectivo l’asimila y la fa reproducir en o tiempo, ye dicir,  que toda tradición tiene siempre un orichen.

Agora si me queda platero que soi mosico tradicional tanto quan toco cantas quitadas d’o cancionero popular y que no se pueden datar en un tiempo concreto, como quan toco una composición que bell mosico fació fa 10 anyos y que anyo par d’anyo se contina interpretando en o dance d’un lugar. Que soi tant mosico tradicional quan tanyo a gaita de boto, como quan introduzco instrumentos como o teclau  electrico u d’atros puestos aluenyaus con os que fa decenios no bi heba intercambeo. Que soi mosico tradicional quan interpreto una jota aragonesa, una habanera cubana u readapto y li foi un toque aragonés a la canta tradicional rumana “Jiana” u a una canta d’os Beatles.

Porque luen d’o que beluns piensan, a mosica ye patrimonio vivo, ye arte en constant movimiento, y por tanto creativo. Y ista creyatividat y renovación existe tamién en a mosica tradicional que tiene o suyo espacio en un mundo sonoro cada vegada más amplo y globalizau.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.