Sergio Falces: “Con os premios d’a mosica prebamos de que mientres bells diyas se charre d’a mosica aragonesa”

"No sabemos transmitir o fenomeno d'a mosica aragonesa t'a nuestra propia sociedat"

Sergio Falces, de Aragón musical

Sergio Falces, de Aragón musical

En amanando-se a celebración d’a gala d’os premios d’a mosica aragonesa, charramos con Sergio Falces, miembro de Aragón musical, entidat que organiza istos premios y que luita por a mosica feita en Aragón.

 

Ta qui no conoixca o prochecto, ¿qué ye Aragón musical?

Aragón musical somos una asociación que en 2004 formemos tres personas – Beatriz Pitarch, David Chapín y yo mesmo – que nos chuntemos ta espardir tot lo que tenese que viyer con a mosica aragonesa. Nusatros venimos de diferents emisoras de radio y lo que querebanos yera tener un meyo de comunicación propio ta poder fer lo que queresenos de traza de raso libre.

Lo que prebamos ye d’espardir a mosica d’Aragón. En primeras yera por Aragón pero, en tener un portal d’internet, paras cuenta de que bi ha muitas visitas que no son d’Aragón ni d’Espanya y alavez paras cuenta de que yes espardindo a mosica aragonesa t’Aragón y t’a resta d’o mundo.

 

A escape plega a gala d’os premios d’a mosica aragonesa. ¿Cómo viyes as candidaturas d’ista anyada?

Muito bien, porque nomás tenemos a Bunbury en un alpartau y a Amaral en un atro. Alavez somos contentos porque a dengún no le fa goi que arramplen masiau. A mosica aragonesa ye muito más que Bunbury y Amaral, qui han d’estar-ie porque son parti d’a mosica aragonesa, pero ye difícil competir dende una colla normal en dembas como a producción u os videos. Nusatros somos contentos porque ista anyada ye tot prou repartiu.

Os candidatos que más se repiten son The Faith Keepers y Lírico, qui antimás i tanyerán, y Aer. Creyemos que son una buena muestra d’o que bi ha aquí. Bi ha muito más, ye de dar, pero ye una representación de lo que bi ha.

 

¿Bi ha bella novedat en os premios?

A novedat ye que ista anyada bi ha una nueva categoría, que ye ta la millor programación. Pensamos que as salas de conciertos y festivals fan una faina important y que ha d’estar refleixada en os premios d’a mosica aragonesa y pensemos que una buena traza de refirmar ixa faina ye dar-les un premio. Ista primer anyada ye bien repartiu porque tenemos Pirineos Sur, a sala XXI de Uesca, a Sala López de Zaragoza y l’Arrebato, que son quatre puestos muito diferents. Con os premios prebamos de bella traza de que se valure o treballo d’a chent que bi ha por aquí.

Tamién bi ha un atro cambio que ye o premio t’a canta en luenga minorizata que se l’ha cambiau o nombre. Muita chent nos deciba que luenga minorizata aragonesa podría estar o rumano por eixemplo. Alavez a partir d’ista anyada o premio se clama t’a canta en luenga autoctona a on que s’incluye o catalán y l’aragonés y as suyas variedatz.

 

Cuanto a la propia gala ¿qué podremos viyer-ie?

Bi habrá tres actuacions prou pinchas: Faith Keepers ta ubrir. Tamién Lírico que fa rap. L’anyada pasada estió a primera que i metiemos rap y quedó muito bien. Antiparti de Violadores del Verso qui estioron en os II premios. Nos faltará meter-ie metal u rock una mica más furo, que creigo que ye una asignatura pendient que encara tenemos.

Tamién i tendremos a Gavy Sanders que será a zaguer actuación que faiga. En as anyadas cinquanta estió pioner d’o rock. Fació tranya ta rockers que agora mesmo son fendo cosas en Aragón. Creigo que ye bien que remate a suya carrera en os premios d’a mosica aragonesa. Ell recibirá antimás o premio especial t’a trachectoria.

Arredol d’ixas tres actuacions y ixas entregas de premios bi habrá sorpresas y chent que ferá a entrega d’o premio metendo una mica d’humor. Ista anyada no bi habrá humorista, pero os “entregadors” tendrán una mica más de protagonismo.

Sobre tot, quiero animar a la chent que no conoixca istas collas a que i vaiga porque se va a quedar eslucernada quan los veigan sobre o scenario. Prebamos de plegar a chent que no tienga ni ideya d’a mosica aragonesa. Los que la conoixemos ya la conoixemos. Que belún que no’n conoixca mica y veiga a los Faith Keepers con lo que fan en o scenario se quedará eslucernau.

 

A D.Ch.A. tos ha retallau a subvención ¿tos han dito por que? ¿Cómo tos ha prebau?

Sisquiá la D.Ch.A. nos hese retallau o suyo patrocinio. En realidat nos lo ha sacau de tot. Nos ha sacau o 100% d’o que meteba. Pensabanos que nos meterían pocos diners. Ya l’anyada pasada baixó prou. No podebanos pensar que estase zero, sincerament. Os obchetivos d’os premios d’a mosica aragonesa, d’Aragón musical y d’a D.Ch.A. son comuns a soben y pensabanos que hebanos d’ir d’a man.

En o sector d’a mosica bi ha qui diz que no se nota a crisi porque a crisi ye contina. Bella cosa d’ixo sí que bi ha. Pero agora ye tot más dificil. Bi ha chent que no puet ir a ensayar porque treballa más horas que no antes, por eixemplo. Quan les conchelan o chornal, quan no tiens refirmes en a tuya vida personal ye dificil adedicar tiempo a lo tuyo hobby. Porque desgraciadament, a más gran parti d’as vegadas, a mosica ye un hobby.

Ya quan charramos de que a mosica siga bella cosa laboral… Que ye l’obchetivo de muitos mosicos. Que igual que un inchenier quiere estar inchenier, ye lochico que un mosico quiera estar mosico. En lo laboral lo va a tener muito más dificil.

 

Cartel d'os premios, por Javi Polo

Cartel d’os premios, por Javi Polo

Fa poco se celebró o Roscón Rock en Zaragoza. Ista ye siempre una chornada reivindicativa que demanda locals d’ensayo, salas de conciertos y muitas atras cosas. ¿Cómo se van cumplindo istas demandas d’os mosicos? ¿Van cambiando as cosas en a ciudat?

A zaguer noticia que tenemos, charrando con o Concello, ye que se va a recuperar o ciclo Muévete, que ye bella cosa important.

Tamién ye verdat que bi ha habiu muita presión con o tema d’as salas y ye verdat que ya no ye habendo-ie os problemas d’antis de denuncias, u ye habendo-ne menos. Nos queda encara la DeVicio, que pareix que no bi ha traza d’apanyar ixo, porque be d’haber bella persona que s’adedica a denunciar a la DeVicio sistematicament, pero sí que se van conseguindo cosas. Ye important que a salas como l’Arrebato las deixen en paz.  Ye bien difícil de trobar chent inquieta que mueva la cultura. Pues bi’n ha. Ixe elemento que ye o combustible d’a cultura en Zaragoza y en Aragón cal conservar-lo bien y cudiar-lo bien.

Con tot y con ixo cal ir dillá. O centros cívicos son muertos de risa, por eixemplo. Dicen que no bi ha diners ta explotar-los. ¿Cómo te gastas diners en fer un centro cívico a-saber-lo de pincho y dimpués no tiens diners ta explotar-lo? No viyemos que tienga ixo garra sentiu. Antimás, bi ha salas que se queixan porque se programa en centros civicos. Pues lo siento muito pero cal fer-las servir.

Bi ha muito que fer. Cal dar ferrete con as reivindicacions d’o Roscón Rock una por una.

 

A iniciativa 1+1, de que por cada colla forana, tanya una aragonesa ¿cómo va funcionando?

Se prencipió a charrar d’ista iniciativa en o Roscón Rock y de feito o Concello sí que cal decir que se porta bien. A nusatros bella vegada nos grita y nos diz “Siente, que tenemos a tal colla que vienen de no sé do y nos fería goi de viyer con que colla local pega”. Mesmo bellas vegadas de collas locals, en meten dos. Bellas vegadas cal estirar más as orellas d’as salas privadas que a o Concello. Que siempre somos dando mal con o concello y cal fer-lo porque cal estar a la tisva, pero ye verdat que son as salas privadas as que ixublidan a soben lo d’o 1+1. De que ye muito bien que traigas a belún de difuera, pero tamién con beluno d’aquí. Mesmo por o negocio. Porque as collas trayen a los suyos amigos y a chent d’aquí. Bi ha vegadas que trayes a chent de difuera no guaire conoixius y a colla local que metas será la que trayerá chent.

Quan lo proposemos fa anyadas, te mirabas as achendas de concierto y en garra cabo se feba ixo. Muito menos dende o concello.

Aragón tien muitas “collas rurals” que son argüellosas d’estar-ne ¿Ye más, menos u igual de dificil tanyer en una colla “de lugar”?

En Aragón musical nos critican a soben de que somos muito centralistas. Y ye verdat. No adubimos a plegar ta totz os puestos. Ye una error muito gran que tenemos y que reconoixemos.

No mover-te por Zaragoza y Uesca – porque lo de que Teruel no existe ye una realidat – fa que a chent te tienga menos en cuenta. En ixe aspecto ye pior. En atras cosas, como tanyer en o lugar tuyo u d’a redolada, lo tendrás bien facil. Ensayar tamién ye muito más facil, por quatre duros. Pero a la hora de salir d’astí, ye más dificil que se te prenga en serio.

Bi ha colectivos que son fendo cosas muito pinchas dende difuera de Zaragoza u Uesca. La Ranetas, por eixemplo, que son en Alcanyiz, son chent muito inquieta que fa muitas cosas y bellas vegadas ixublidas que son astí simplament porque no lo viyes de cutio. De calidat, bi’n ha muita en as collas de lugars.

 

Internet lo ye cambiando tot. ¿Qui no se i adapta ye condenau a morir?

De tot. Siempre bi ha excepcions. Bi ha chent que no leva o suyo prochecto ta internet y le va bien. Pero yo creigo que cal estar-ie. Qui nos fa goi a mosica, dentramos en internet y si quiers plegar t’a chent que le fa goi a mosica, lo has de fer.

D’antismás qui feba un fancine lo feba en papel. Agora le sale mas barato más ecolochico y plegas ta más chent fendo-lo en internet. Qualsiquier cosa que faigas, u t’adaptas u yo no sé si morirás, pero posiblement sí.

 

Aragón ha teniu muitos artistas conoixius a ran internacional. Bunbury u Amaral, prou que sí, pero tamién han saliu por tot atras collas como Violadores del Verso, Mallacán u B vocal. Somos referents en rap u pop ¿creyes que isto se sabe transmitir t’a resta d’a sociedat u nomas se’n enteran os fans d’as collas.

No, no. Has dau con a clau. Por población, que no somos que quatre mixins, tenemos un granizo porcentache de collas, y antimás buenismas de tot. Y no nomás Heroes y companyía. Antimás de mosicas muito diferents. Ixo Rai en o suyo diya, no teneba cosa que viyer con Bunbury, ni iste con El Bosque, u Mallacán, que han tanyiu en Chapón!. Charremos de Manolo Kabezabolo. Manolo Kabezabolo, vaigas t’a on que vaigas, i conoixen o nombre suyo. Tot lo mundo conoix a Manolo Kabezabolo en Espanya. En Aragón ni te digo. Violadores del verso, … tenemos una cantidat de collas sobrebuenas que fan cosas muito diferents.

Yo creigo que no sabemos exportar-lo, prou que no, ni transmitir o fenómeno d’a mosica aragonesa en a nuestra propia sociedat. Yo no sé como fer-lo, porque como colectivo, o nuestro obchetivo principal ye d’espardir a mosica aragonesa y no sabemos como fer-lo. Hemos prebau de tot.

A excusa d’os diners siempre ye astí, pero creigo que ya una excusa facilona. Si no bi ha diners lo fas igual.

O Roscón Rock ye una buena ideya porque a chent que fa una gambada viye lo que fan os mosicos. Cal quitar a mosica t’a carrera porque qui no te conoix no va a ir ta una sala a viyer-te.

Con os premios d’a mosica aragonesa prebamos de fer ixo tamién. Que mientres bells diyas se charre d’a mosica aragonesa. A lo menos mientres bells diyas, en os meyos de comunicación se charra de collas que muita chent no sabe qui son. S’enteran de que bi ha bella cosa que no ye Bunbury y Amaral.

Una pregunteta personal: ¿Qué levas agora mesmo en o tuyo mp3?

Bueno, lo ascuito en o movil porque a soben levo o Spotify.

No sé, tiengo de tot. De mosica aragonesa soi ascuitando muito a Lírico, que o suyo disco me ye fendo a-saber-lo de goi. Mesmo mosica clasica tiengo. Sick Brains tamién lo soi ascuitando muito, por o concierto d’a López.

Tamién me han pasau un disco de Bronson que encara no han editau que suena muito bien. En zagueras, muita mosica negra, que no me feba guaire goi, pero me soi aficionando-ie.

Agora soi ascuitando muito una colla que se diz Two door cinema club. Ye una colla de “modernetes”, que les dicen. Agora dos d’os miembros de Aragón musical somos levando o Mondo Sonoro Aragón y somos ascuitando un poco d’a mosica de l’estilo de Mondo Sonoro ta saber lo que levamos.

O disco de Capsula, que son rockers, tamién lo ascuito muito en zagueras, …

 

Una rispuesta a Sergio Falces: “Con os premios d’a mosica prebamos de que mientres bells diyas se charre d’a mosica aragonesa”

  1. ¿Ni una pregunta sobre l’aragonés?!?

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.