S’estalapiza en os Alpes un avión que feba o trachecto Barcelona-Düsseldorf

I heba 144 pasachers y seis tripulants. No i hai supervivients. A companyia informa de 67 alemans entre as victimas

Airbus 320 de Germanwings. Foto: aeroprints.com (CC-BY-SA 3.0)

Airbus 320 de Germanwings. Foto: aeroprints.com (CC-BY-SA 3.0)

O vuelo 4Un9525 d’a companyía alemanya German Wings, que feba o trachecto Barcelona-Düsseldorf, s’ha estalapizau iste maitín en os Alpes por causas que encara no s’han aclariu. L’avión, un Airbus 320, heba de salir de l’aeropuerto d’o Prat a las 9.35, pero no s’ha elevau dica as 10. Ent’as 11 ha desapareixiu d’o radar, y seguntes as zagueras informacions, no ha plegau a ninviar garra mensache d’emerchencia. O puesto an que s’ha estalapizau ye en una zona montanyosa cerca de Barceloneta de Provença, en Occitania. L’avión teneba una capacidat ta 174 pasachers y bi viachaban 144 pasachers y 6 tripulants. A mida que abanzan as horas se van sabendo chicotz detalls sobre os pasachers.

Seguntes a vicepresidenta espanyola, Soraya Sáenz de Santamaría, entre os pasachers n’i heba quaranta y cinco ‘con apellius espanyols’; ye o solo dato que n’ha dau, sin especificar de qué ciudadanía yeran. O 9 Nou informa que i heba una quincena d’alumnas y profesors alemans que heban feito un intercambio con l’instituto Giola de Llinars del Vallès. Tamién viachaban dos treballadors d’a planta de Delphi en Sant Cugat del Vallès, tal como informa Cugat.cat, que cita fuents d’a interpresa: o director de recursos humanos y un treballador d’a sección de montache y delegau sindical d’a UGT, que iban a una reunión d’o comité internacional d’a companyía. Seguntes ACN, entre as victimas i hai tamién dos treballadors d’a Feria de Barcelona, a on iste maitín s’ha cancelau a inauguración d’a feria d’industrias graficas Graphispag.

Os pasachers heban feito o embarque en a puerta 34 d’a terminal 2 de l’aeropuerto d’o Prat, y ye en ista terminal a on s’atienen agora os familiars.

Actividat d’os gubiernos

A vicepresidenta espanyola, Sáenz de Santamaría, ha anunciau que o suyo gubierno heba creyau un gabinete de crisi. Tamién l’ha feito o gubierno francés. O president Françoise Hollande ha descartau que pueda trobar-se-ie garra supervivient; y o ministro d’Interior, Bernard Cazeneuve, ha anunciau que ya s’heban trobau repuis de l’avión.

A vicepresidenta d’o gubierno catalán, Joana Ortega, se desplaza ent’a zona de l’accident. O gubierno, amás, ha meso a la disposición d’os familiars o telefono 012, y o 902400012 por si se truca difuera de Catalunya. O consellero d’Interior, Ramon Espadaler, y o de Territorio, Santi Vila, son en l’aeropuerto d’o Prat.

O president Artur Mas ha suspendiu l’achenda oficial y ha anunciau que o gubierno catalán organizaría tot o transporte colectivo necesario t’as familias que queresen ir ta Occitania. O president espanyol, Mariano Rajoy, tamién la ha suspendida. Ha compareixiu dende Vitoria y ha anunciau que tornaba enta Madrit.

Encara no se’n saben as causas

German Wings ye una companyía filial de Lufthansa. L’avión que s’ha estalapizau yera operativo dende 1991 y heba pasau todas as revisions necesarias. Veyetz-ne aquí a ficha.

Carsten Spohr, president de Lufthansa, ha dito que encara no sabeban os motivos de l’accident. ‘Si nos confirman as nuestras temors, iste ye un día negro ta Lufthansa. Asperamos trobar supervivients’, ha dito.

Fuent: http://www.vilaweb.cat/noticia/4237257/20150324/sestavella-alps-avio-feia-trajecte-barcelona-dusseldorf.html

Una rispuesta a S’estalapiza en os Alpes un avión que feba o trachecto Barcelona-Düsseldorf

  1. Pingback: S’estalapiza en os Alpes un avión que feba o trachecto Barcelona-Düsseldorf | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.