Siet muertos en Venezuela en a nueit dimpués d’as eleccions

S'enristió contra siedes d'o Partiu Socialista de Venezuela, centros medicos y cargos d'o gubierno. Capriles desconvoca a manifestación que s'iba a fer iste miercols

Una d'as siedes d'o PSUV cremadas (Foto: La iguana TV)

Una d’as siedes d’o PSUV cremadas (Foto: La iguana TV)

A nueit d’as eleccions en Venezuela ha rematau con siet muertos y a embute de disturbios y enrestidas. Istos feitos plegan dimpués d’a victoria por un chiquet marguin de Nicolás Maduro, lider d’a cucha, y de que Henrique Capriles, candidato d’a dreita, no reconoixese os resultaus y demandase  un recuento, cosa que encara no ha feito de traza oficial.

Entre os muertos, bi ye un funcionario d’a policía de Tachira (en a parti oeste d’o país), u un ciudadan que yera celebrando a victoria de Maduro quan ell y os suyos amigos estioron tiroteyaus. Tamién se rechistró una enrestida contra la casa d’a presidenta d’o Consello Nacional Electoral (CNE), Tibisay Lucena. y dende o gubierno s’informó de l’incendio de bells edificios y autos con chent aintro d’ells, como as casas d’o PSUV en l’estau Anzoátegui y en Táchira”

Bells centros medicos, menaus por cubanos, estioron tamién enrestius. Dende bells meyos se han vinclau istas enrestidas con o Tweet feito por o periodista Nelsón Bocaranda, a on que dició que en o Centro de Diagnostico Integral de La Paz, en l’estau Zulia, yeran amagando actas de votación. A nueit deixó tamién más de sisanta personas feridas.

Henrique Capriles, qui convocó caceroladas y manifestacions ahiere, ha desconvocau a movilización que bi heba ta iste miercols y ha demandau a los suyos seguidors que se “repleguen”. “Qui siga en o costau d’a violencia le ye fendo lo chuego a lo gubierno”, declaró o candidato d’a Mesa d’Unidat Democratica. A manifestación s’heba viedau de man d’o gubierno. Tamién fació una ufierta de dialogo con o president Maduro, encara que en un primer inte refusó ixa posibilidat: “Yo no pacto ni con a mentira ni con a corrupción, o mio pacto ye con Dios y con os venezolanos”, dició a nueit electoral.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.