Siet personas detenidas por presuntament furtar en diferents localidatz aragonesas

Os furtos s'heban produciu en as localidatz de Sant Mateu de Galligo, Exeya d'os Caballers y Casp

Cosas furtadas en uno d'os vehíclos interceptaus. Foto: Guardia Civil

Cosas furtadas en uno d’os vehíclos interceptaus. Foto: Guardia Civil

A Guardia Civil espanyola ha deteniu a siet personas en diferents poblacions d’Aragón por estar presuntas autoras de furtos con fuerza en as cosas. As detencions han estau realizadas por os equipos Roca, especificos pa prevenir furtos en o medio rural.

En Sant Mateu de Galligo, o pasau 28 de chinero, una trucada ciudadana avisaba a o cuerpo policial d’un furto en una explotación ganadera en Sant Mateu de Galligo. Qualques achents interceptoron un auto, con dos hombres de 42 y 20 anyos vecins de Villanueva de Galligo, que se’n iba d’a explotación, comprobando o transporte de perfils metalicos, que dimpués de fablar con o propietario y viyendo as instalacions, se comprobó que os perfils, tallaus, correspondeban a dita explotación.

O mesmo diya, de nueitz en Exeya d’os Caballers, miembros d’o equipo Roca de dita ciudat identificoron a os ocupants d’un auto aturau en Campa Miravegas, en l’A-68. Os achents comproboron que en dito auto s’amagaban quatro garrafas con gasoil. A suya ulor alertó a os achents, trobando-ie amás trozos de manguera. As sospeitas de posible furto de combustible plegoron t’o cambión d’o canto, que presentaba o tape d’o combustible forzau y sacau o gasoil. As dos personas detenidas por furto tienen 28 y 31 anyos y son vecinas de Samianigo.

Pocas horas dimpués, ya 29 de chinero, a las 2:30 h. d’a maitinada, en Casp a Guardia Civil observó un vehíclo aturau en una explanada que tot viyendo a os achents empecipió a fuyida. Una vegada interceptau por o equipo Roca, os achents comproboron que l’auto portaba en os posientos de dezaga diverso material (ferramientas, ropa, chuguetz…) que perteneixeban a una torre proxima que presentaba a puerta forzada. O propietario d’a torre reconoixió a propiedat d’os obchectos substraius.

En o vehíclo interceptau i heba tres personas, vecinas de Zaragoza, de edatz entre 31 y 37 anyos y acusadas como en os atros casos de furto con fuerza en as cosas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.