Sin alcuerdo en a reunión entre Unipost y sendicatos

Contina a vaga indefinida que ya fa a suya dotzena chornada

Protesta d'os treballadors d'Unipost (Foto: CGT)

Protesta d’os treballadors d’Unipost (Foto: CGT)

A plantilla d’Unipost en Zaragoza concaró iste chueves unatra chornada de vaga. “Unatra vegada concentrando-nos, en prencipiar a chornada laboral, en a puerta d’a interpresa, deixando-nos a voz debant d’os nuestros companyers treballadors que no han segundiau a vaga, como si o problema no estase cosa d’ells. Caldría remerar que a baixada de chornals, a continidat d’os ERTES y os despius anunciaus por a interpresa son una menaza ta toda la plantilla”, explica o comité intercentros. A tamás d’ixo y d’as dificultatz economicas que suposa “aguantar once diyas de vaga“, o porcentache de seguimiento se mantiene cada diya por dencima d’o 35%.

Bellas horas más tardi, sobre as 12:00, se fació atra concentración, ista vegada en a plaza Espanya, a on que estioron meya centena de personas que espardioron entre os ciudadans as causas y enchaquias d’istas movilizacions.

Antimás, iste chueves, bi habió una reunión entre a interpresa y o comité intercentros, a on que no se plegó en garra alcuerdo. “A interpresa contina encerrinada con a suya postura y ha repetiu que aguardará dica lo 14 de chenero ta viyer si a comisión Consultiva Nacional de Convenios Colectivos le da un veredicto favorable en l’afer d’a baixada d’os chornals, que si no estase asinas tornaría a convocar a o comité intercentros con caracter urchent ta negociar l’actual situación”, apunta la sección sindical de CGT en Unipost.

“En a mesma reunión, a interpresa comunicó, en un primer inte, que no teneba prous diners ta concara a venient nomina, pero en un ratet se desdició algando que os accionistas meteban tres millons d’euros ta pagar-la. Con tot y con ixo encara queda pendient meya paga de verano y la de Nadal”, adhibe a sección sindical.

“Con tot isto, a vaga contina entabant, no bi ha enchaquia ta desconvocar-la, bien de revés; continan os retrasos en as pagas dende fa siet meses y contina pendient a menaza de rebaixa de chornal y d’os despius. Por ixo, iste viernes, as y os treballadors d’Unipost en Zaragoza concararán o dotzeno diya de vaga indefinida.”

Ta rematar, a plantilla d’Unipost ha quiesto agradeixer a todas las personas que estioron iste chueves en a concentración, “o suyo refirme y solidaridat con os y as treballaderas”.

 

Fuent: http://arainfo.org/2014/01/sin-acuerdo-en-la-reunion-entre-unipost-y-sindicatos/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.