Sindicalistas andaluces substrahien alimentos basicos ta chent pobra

Miembros d'o SAT se levoron de dos supermercaus andaluces sin pagar alimentos ta dar-los a personas sin recursos

Juan Manuel Sánchez Gordillo. Foto: Wikipedia

Ahiere personas vinculadas a o Sindicato Andaluz de Treballadors (SAT) facioron una acción en dos supermercaus, uno en Ecija (Sebilla) y l’atro en Arcos de la Frontera (Cadiz), en os que dentroron ta levar-se-ne virolla de primer necesidat (aceite, zucre, legumbres, roz, leit, pasta…) sin pagar os productos ta dar-los a chent amenistada.

En Ecija, os miembros d’o SAT dentroron en un supermercau Mercadona a on plenoron diez carros con virolla. S’han produciu incidents entre treballadors d’o supermercau y sindicalistas, encara que no han pasau a mas. Os sindicalistas han puesto quitar d’o supermercau nueu d’os diez carros que han levau enta un banco de virolla en Sebilla. A cadena de supermercaus ha anunciau que denunciará a sustracción d’os productos. Fuents d’o SAT tanimientres fablan “d’expropiación forzosa” debiu a la grau situación de cada vegada mas familias en Andalucía debiu a la crisi economica, con un 35% de familias por debaixo d’o ran de pobreza en Andalucía. Difuera los asperaba Juan Manuel Sánchez Gordillo, diputau d’o partiu integrau en IU, CUT-BAI, en o Parlamento d’Andalucía, alcalde de Marinaleda y dirichent d’o SAT.

En Arcos de la Frontera, dentroron en un supermercau Carrefour tamién con as mesmas intencions. Os sindicalistas consiguiron plenar 20 carros plenos de virolla, pero a Guardia Civil empachó que podesen salir-ne. A la fin, dimpués d’una larga negociación entre miembros d’o SAT y Carrefour, iste supermercau acceptó que os sindicalistas se’n levasen 12 d’os carros que irán destinaus a os servicios socials d’as localidatz de Bornos, Puerto Serrano y Espera.

Antiparti, Sánchez Gordillo ha afirmau que istas accions tornarán a repetir-se. “Belún ha de fer qualcosa ta que i haiga familias que puedan minchar totz os diyas”, ha comentau Gordillo.

O president andaluz, José Antonio Griñán (PSOE), calificó de “barbaridat” l’acción, a o que Gordillo ha respondiu que “mas despreciable” ye o caso d’os expedients de regulación de emplego (ERE) u l’alcuerdo entre PP y PSOE sobre a pasada reforma d’a Constitución espanyola.

O Ministerio de l’Interior espanyol ha dau hue orden de detener tanto a Sánchez Gordillo como a todas aquellas personas que son implicadas en os feitos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.