Somos denuncia as violacions de dreitos d’o colectivo LGTB

17 de mayo, Día Internacional contra a Homofobia, Transfobia y Bifobia

L’asociación Somos d’Aragón ha denunciau con motivo d’o 17 de mayo, Día Internacional contra a Homofobia, Transfobia y Bifobia, as violacions d’os dreitos humans que siguen sufrindo as personas LGTB. A organización ha quiesto remarcar en ista ocasión a discriminación que sufren, por diversos motivos, os menors LGTB en os centros escolars.

Seguntes Somos, a transexualidat encara sigue estando considerada inchusta y erroniament una malotía. L’asociación ha considerau que mientres a Organización Mundial d’a Salut y atros organismos medicos internacionals no eliminen a transexualidat d’o suyo listau de malotías mentals, a luita por a erradicación d’a transfobia no será posible.

Dende Somos han declarau que “a comunidat internacional ha de meter fin de traza urchent a la estigmatización ent’as personas transexuales”. Asinas mesmo, “en Espanya se ha d’aprebar una lei d’ambito estatal integral de no discriminación por identidat de chenero y de reconoixencia d’os dreitos d’as personas transexuales, como as ya existents en qualques rechions como Andalucía, Canarias, Extremadura, Madrit, Navarra u País Vasco y por o qual ya somos treballando en Aragón convocando y promovendo una Mesa de Treballo con atras entidatz t’a elaboración d’a mesma”.

Somos sostiene que “l’efecto mas sangrant resultant d’a discriminación son os delitos d’odio, que afectan a todas as personas LGTB, y que requieren d’un claro compromis politico y institucional que leve a aprevenir-los con medidas pedagochicas, acazar a qui cometan as agresions y a protecher a las victimas. Amás, debant d’a falta de formación y desconoiximiento d’ista realidat, Somos sigue treballando por a sensibilización por meyo d’a campanya Ret Educa de luita contra o Bullying en centros escolars dende fa ya seis anyos, formando a alumnau, profesorau y familias”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.