‘Somos un estau masiau descentralizau’, diz Sáenz de Santamaría

O gubierno espanyol quiere reducir os parlamentos y suprimir os defensors d'o pueblo en una reforma que sacará competencias a las autonomías

santamaría y montoroO gubierno espanyol ye decidiu a fer un empentón definitivo ent’a centralización, recuperando competencias y funcions que agora tienen as comunidatz autonomas, d’as qualas se suprimirían organismos publicos que fan funcions que l’executivo de Rajoy considera que son duplicadas con as que ya fa l’estau. ‘Somos un estau masiau descentralizau’, ha dito hue a vicepresidenta espanyola, Soraya Sáenz de Santamaría, en a conferencia de prensa posterior a o consello de ministros que ha aprebau a reforma de l’administración. Con istas midas o gubierno espanyol pretende cabidar 37.700 millons d’euros en tot l’estau dica 2015.

Iste plan apunta a posibilidat de que as comunidatz autonomas eliminen organismos y ‘reduzcan’ a mida de qualques institucions, ‘mesmo d’especial relevancia’, como ye o caso d’as asambleas lechislativas, ye decir, os Parlamentos. Tamién quiere recuperar as competencias y funcions que dica agora teneban as comunidatz. Constan os defensors d’o pueblo, os institutos d’opinión (como o CEO), y os tribunals de cuentas. Son ‘recomendacions‘, pero l’executivo avisa que iste viernes ferá publico o coste d’os organismos que considera ‘duplicaus’.

Asinas consta en o resumen d’o documento d’a Comisión ta la Reforma d’as Administracions Publicas (CORA), que l’executivo espanyol asume como propio y aplicará en o que fa referencia a las suyas arias.

O gubierno espanyol apunta que as comunidatz ‘pueden ganar en eficiencia exercendo as suyas facultatz d’autoorganización’ que les permiten d’adoptar decisions de ‘reducción u eliminación de dependencias y organos’. En iste punto, recorda que bells territorios (como Castiella-La Mancha) ya han aplicau midas en ista dirección ‘y asinas lo recomienda l’informe’, como a ‘supresión d’entidatz u a reducción d’a mida de belunas, mesmo d’especial relevancia institucional, como as asambleas lechislativas‘ u os defensors d’o pueblo.

L’executivo de Mariano Rajoy tamién quiere que as comunidatz supriman as suyas achencias de protección de datos, as chuntas consultivas de contratación administrativa, os tribunals de recursos contractuals, as achencias d’evaluación en l’ambito universitario, as achencias autonomicas d’enerchía, as achencias de meteorolochía, a inspección d’aeropuertos, os institutos u servicios cartograficos, y os organos d’esfensa d’a competencia. Se i adhibe a voluntat d’asimilar as oficinas en l’exterior y compartir medios por o que fa a la conservación de carreteras, as plataformas de formación de treballadors publicos u de chestión de centros publicos, amás d’eliminar buena parte d’os 90 observatorios existents.

O listau completo no s’ha facilitau, pero l’executivo ya ha abanzau que ha trobau 118 ‘solapamientos’ d’os quals 111 tienen caracter sectorial. O suyo obchectivo, diz, ye aplicar o prencipio de ‘una administración, una competencia‘.

Tot ixo que concierne a las comunidatz autonomas son ‘recomendacions’ que o ministro Montoro ya ha anunciau que tien intención de vinclar a la negociación d’os obchectivos de deficit d’as comunidatz autonomas. De feito, o conchunto d’o documento será obchecto d’analís por parte d’o Consello de Politica Fiscal y Financiera (CPFF) que ha de tener puesto entre finals de chunio y prencipios de chulio.

A opinión publica como elemento de presión a las comunidatz

Fuentes de l’executivo admiten que l’estau no puede obligar a os territorios a actuar en ista dirección. Por iste motivo o gubierno espanyol preveye aplicar una doble vía: a Lei d’estabilidat y emitir ‘sucherencias’ a os territorios que no cumplan os compromisos d’eliminación d’entes publicos y os obchectivos de deficit. Si os territorios no actúan seguntes as recomendacions, l’executivo espanyol dará a conoixer a la opinión publica o coste d’istos servicios y l’estalbio que embrecaría que l’estau asumise as competencias.

Test previo a la creyación de nuevos organismos

As mesmas fuents han asegurau que l’estau ‘cusirará de contino’ ta prevenir a creyación de nuevos organismos por parte d’os territorios. De feito, qualsiquier creyación d’un nuevo organismo habrá d’ir acompanyada d’una chustificación estricta d’as razons que la motivan, a on ya se valure a existencia de posibles duplicidatz y os medios humanos, materials y financiers que disposará ta fer os suyos quefers.

En o caso d’organismos de l’estau, serán evaluaus periodicament y si no subsisten as razons u recursos que fundamentoron a suya constitución ‘se procederá a o suyo acotole’.

Amás, l’executivo preveye d’establir a obligación t’as comunidatz d’informar y fer constar en o rechistro estatal d’entidatz qualsiquier nuevo organo que creyen. Seguntes istas fuents, se sozmeterá a istos organismos a un ‘test’ ta veyer si s’incurre en una duplicidat, y en caso d’estar asinas s’emitirá una recomendación negativa que en caso de no estar atendida embrecará dar a conoixer o caso a la opinión publica.

Lei basica ta definir os tipos de sociedatz

En cambeo, o gubierno espanyol sí que ferá uso d’a lechislación basica ta definir y delimitar os tipos de sociedatz y evitar que se conviertan en o que considera que puede estar un mecanismo ta enguiliar os controls de l’estau.

Os concellos tendrán cinco anyos ta traspasar as competencias en sanidat y educación

Por o que fa a la reforma de l’administración local, o gubierno espanyol estipula en o texto que se mete punto y final a o que considera que son “competencias impropias” d’os concellos, feito que suposará un estalbio de 7.129 millons.

Fuent: http://www.vilaweb.cat/noticia/4127718/20130621/som-massa-descentralitzat-diu-saenz-santamaria.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.