“Stop Desafucios” convoca una concentración debant d’a siede d’o PP de Zaragoza

Os diputaus d'o PP en o Congreso espanyol no han respondiu as cartas ninviadas por a Plataforma

Concentración debant d'a siede d'o PP en Zaragoza

Concentración o pasau febrero debant d’a siede d’o PP en Zaragoza

Stop Desafucios Zaragoza, un foro a on que s’arroclan afectaus por as execucions hipotecarias y refirmants d’un cambio en a politica de vivienda y hipotecas, han convocau ta iste martes una concentración debant d’a siede d’o PP en Zaragoza, en a carrera zaragozana d’a Gran Vía.  Baixo lo lema “Bi ha vidas en chuego”, acusan a lo gubierno d’estar ixordo debant d’a clamor social en refirme a la ILP presentada o pasau mes de febrer, con más de 1.400.000 firmas.

A plataforma ha remerau que as enqüestas dan más d’un 90% de refirme popular t’a ILP. En o pleno de 12 de febrero s’aprebó, con o voto a favor d’o PP qui en primeras heba anunciau que votaría en contra, admitir a tramite a lei. Manimenos, Stop Desafucios acusa a ixe partiu d’estar esbafando-la y avisa que o tramite rematará en una serie de “midas que no solucionan mica la situación d’os cientos de millars de familias que son sufrindo dreitament as conseqüencias d’a gran estafa que estió a esclatada d’a bombolla inmobiliaria”.

Remeran tamién que l’acción convocada ta iste martes ye “de tot pacifica” y denuncian una campanya de man d’o PP de criminalización enta ista organización y a suya traza de manifestar-se conoixida como “escrache”, a on que os actos se fan en zonas amanadas t’os domicilios particulars de politicos en contra d’a ILP.

Stop Desafucios ninvió cartas ta totz os diputaus esleixius por Aragón en o Parlamento espanyol demandando-les reflexión y ufrindo-les d’asistir a belunas d’as asambleyas suyas ta conoixer de primer man a problematica d’os afectaus. Dengún no i ha respondiu, seguntes sinyala la plataforma.

O chueves 11 continarán as movilizacions, con a presentación en os chuzgaus de Zaragoza d’os escritos t’aturar os procesos d’execución d’as hipotecas. Lo fan dimpués d’a sentencia d’o Tribunal de Luxemburgo a on que se reconoixeba l’arbitrariedat d’a lechislación espanyola cuanto a la lei hipotecaria.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.