Stop Estigma: “O Gubierno d’Aragón ye desmantelando a nuestra atención y servicio d’a salut mental”

Dende Stop Estigma y a Plataforma contra a Privatización d'a Sanidat d'Aragón denuncian "mercantilización" en a politica d'a DGA respective a la salut mental

centro-salud-valdespartera-foto-cronica-de-aragon-300x200

Centro de salut de Valdespartera. Foto: Crónica de Aragón

A zaguers de l’anyo pasau o Departamento de Sanidat, Bienestar Social y Familia d’o Gubierno d’Aragón anunció a suya intención de reestructurar belunas d’as Unidatz de Salut Mental, trasladando-las t’o Centro de Salut de Valdespartera. Iste consultorio absorbería l’atención que dica agora s’ampra en o Centro de Salut de Casablanca y atros dos centros encara sin especificar.

L’Asociación Stop Estigma (Asociación de personas afectadas, profesionals y simpatizants en luita contra l’estigma que levan asociadas as malotías mentals) denuncia que “iste desmantelamiento de l’atención ambulatoria ye un atentau de graus conseqüencias ta nusatros, os pacients y os profesionals”. O nuevo modelo que se pretende adoptar “antepone a competencia entre proveyedors y o control d’o gasto a las nuestras necesidatz medicas”. A mercantilización d’a salut mental ya ye en marcha en Madrit, Asturias y Euskal Herria, resultando “un empioramiento d’a nuestra atención y un gran esquimen t’as interpresas privadas adchudicatarias”.

Stop Estigma remera que “a tamás que actualment as Unidatz de Salut Mental se troban infradotadas, nos son amprando un servicio de calidat. L’atención psiquiatrica que hemos recibiu as y os pacients dica agora ha teniu una orientación comunitaria alazetada en a proximidat d’os centros t’os nuestros domicilios”. As Unidatz de Salut Mental tienen una estreita colaboración con os Centros d’Atención Primaria y con atros recursos d’os vicos y “ista coordinación se perderá con a concentración d’o servicio”.

“As conseqüencias serían devastadoras y muit graus ta nusatros que imos a estar os primers y mayors afectaus como pacients y t’os profesionals que nos atienden, mas largas listas d’aspera en a nuestra atención, sobrecarga d’esfuerzo y treballo t’os y as profesionals que talment influiga negativament en dar-nos l’atención adequada y necesaria” advierte Mª Carmen Lafuente, presidenta de Stop Estigma.

Dende a Plataforma contra a Privatización d’a Sanidat d’Aragón, a on asociacions de profesionals y personas afectadas como Stop Estigma, El Volcán y AFDA son immersas en ella, denuncian que “a politica sanitaria de privatización d’o Gubierno d’Aragón precariza a nuestra atención, as condicions laborals d’o personal sanitario y administrativo y chenera exclusión. A falsa eficiencia d’o discurso de racionalización d’o gasto y a colaboración publico-privada prioriza os intreses d’as interpresas privadas a la nuestra salut”.

Fuent: http://arainfo.org/2013/03/stop-estigma-el-gobierno-de-aragon-esta-desmantelando-nuestra-atencion-y-servicio-de-la-salud-mental/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.