“S’ubre una nueva vía a o soberanismo d’izquierdas”. Entrevista con Valentín Cazaña

A ruptura d’os consensos d’o 78’ nos ufren multiples posibilidatz”

Valentin

Valentin

Charramos con Valentín Cazaña, president de COAGRET, d’a AAVV La Paz, militant ecolochista y candidato a las zaguers eleccions europeas por Puyalón.

As zaguers eleccions europeas han dibuixau un nuevo scenario. ¿Cómo preveyes o curso politico que se ubre?

Sin dubda, os resultaus d’as europeas ubren o prencipio d’una nueva etapa politica en l’estau espanyol, y particularment en Aragón. O modelo bipartidista d’o turnismo entre PP y PSOE, propio d’a transición, por primer vegada pareix que puet estar menazau si aconseguimos construyir una referencia politica rupturista que tienga clara a suya luita por os dreitos socials d’as capas populars, que han estau devastaus mientres istos anyos por os partius d’o rechimen turnista. Os resultaus refleixan a consciencia, cada vegada mayor entre a clase treballadera de que os consensos d’o 78 son a piedra sobre la que s’edificó iste rechimen que retalla dreitos y tracta a las personas como instrumentos a explotar en beneficio d’os grans capitals. A ruptura d’istos consensos y a presa de consciencia arredol d’a mentira que nos han contau istos 36 anyos, chunto con un aumento d’as luitas socials en a carrera, nos ubren a las fuerzas rupturistas posibilidatz muit importants.

En tocant a o soberanismo aragonés d’izquierdas, as eleccions europeas nos han permitiu estar a primer fuerza politica que leva o discurso soberanista d’izquierdas a tot o territorio d’Aragón, estando enquadraus amás en una candidatura con fuerzas parellanas a atros pueblos, que en obtener representación nos permitirá levar as luitas d’Aragón t’o Parlamento Europeu. Con iste ilusionant punto de partida, se ubre una nueva vía pa o soberanismo d’izquierdas, que tien que desempenyar un papel fundamental en ista fase final de ruptura d’o rechimen d’o 78, y treballar pa construyir un prochecto diferent, aon que Aragón como pueblo y tamién as aragonesas tiengan y puedan exercer dreitos inalienables, sin miedo a que os poders financiers sigan os que realment gubiernen, tal como ocurre en iste momento.

Aragón ye un territorio con unas caracteristicas socio-demograficas particulars. ¿Podrías comentar-nos a tuya opinión en tocant a l’ubridura de procesos de confluyencia d’a izquierda?

Soi seguindo istas iniciativas con delera y ganas de que os d’abaixo aconsigamos configurar, tanto pa as municipals como pa as eleccions aragonesas, una ferramienta politica y social que permita levar as luitas d’os movimientos socials aragoneses t’as institucions, t’os Concellos, y por qué no, tamién t’o Gubierno d’Aragón. Estoi que a izquierda rupturista, y os activistas d’as diferents luitas socials aragonesas debemos refirmar y treballar sin compleixos en iniciativas como Ganemos Zaragoza, Alcanyiz, Uesca u Teruel, y atras que sin dubda se ferán servir. Ye en iste marco, con una voluntat de levar t’as institucions un programa rupturista, que tienga a clara intención de treballar dende lo local y dende o parlamento aragonés con un conchunto de propuestas y midas netament d’izquierdas replegadas partindo d’as luitas y movilizacions socials, quan podemos fer-le realment mal a o capitalismo salvache que nos afoga. Estoi que ye un obchectivo prioritario aon que os soberanistas aragoneses d’izquierdas hemos d’incluyir-nos y treballar cadagún aintro d’as suyas posibilidatz porque, efectivament, ganemos pa cambiar-lo tot, pa que conten as personas y no os capitals.

Como portavoz d’o movimiento ciudadano soberanista En a Tuya Man ¿Qué puet aportar o soberanismo d’izquierdas d’Aragón a istos procesos?

Como he dito antes, estoi que a primer alportación sería creyar consciencia y sensibilidat con o feito de que vivimos en un puesto que se diz Aragón, con una personalidat propia, y amás que reivindicacions como o dreito a decidir u l’emplego de l’aragonés y o catalán se normalicen en ista mena de plataformas politicas rupturistas con o rechimen d’o turnismo. Tamién puet estar muit relevant a l’hora de que se veiga mayoritariament como necesario que se planteye tamién una candidatura rupturista d’izquierda pa as eleccions aragonesas. O soberanismo d’izquierdas aragonés puet alportar tamién propuestas pa luitar contra problemas como a despoblación, os problemas pa vertebrar o territorio, l’ature u os conflictos de l’augua. Lo que representamos estoi que ye fundamental pa que a chent entienda a importancia de que as decisions se prengan en Aragón pa poder fer servir programas d’emerchencia social debant d’a crisi, u estimular o teixiu economico d’as nuestras comarcas, por eixemplo.

Recientement s’ha feito o referendum escocés y s’aspera que se faiga proximament en Catalunya. ¿Qué lectura fas d’istas consultas y cómo creyes que afectan a l’abance d’a soberanía aragonesa?

Encara que no haiga ganau o sí en o referendum, o feito de que s’haiga feito va a definir un antes y un dimpués en a luita por l’exercicio d’o dreito a decidir d’os pueblos. Nomás con toda a clase politica d’a City, as menazas dreitas d’as institucions europeas y os mercaus financiers presionando en contra d’a independencia han aconseguiu por l’inte aturar l’anglucia d’independencia d’iste pueblo. O feito de que os más chovens sigan mayoritariament independentistas da asperanza pa que en no guaire tiempo se gane unatro referendum. D’atro costau, tamién ye cierto que os intreses britanicos tienen muito que viyer con no perder os importants recursos enercheticos con que conta Escocia, y que facilitarían fer viable o nuevo estau independient. Con tot y con ixo, o feito de que con toda ixa campanya demagochica en contra, o 45% d’os escoceses aposten por a suya independencia, ye una evidencia más de bella cosa que venimos decindo os movimientos politicos que defendemos a emancipación d’os pueblos, o fracaso d’o centralismo d’os estaus-nación, que niegan o dreito d’autodeterminación d’os pueblos, mientres d’atra man a gran parte d’a suya clase politica se desfa en canticos d’alabanza enta a suya constitución y que, tal y como se diz en l’estau espanyol, tot o mundo puet expresar-se democraticament. Isto ye una falacia como contrimostra tot l’aparato institucional y mediatico que se vien adedicando a menazar a Catalunya con a suspensión de l’autonomía, y mesmo con procesar a os responsables institucionals que empenten u refirmen o referendum. ¿Por qué bi ha miedo a que un pueblo vote sobre a decisión más important que le pertoca, querer estar u no un subchecto de soberanía, y en conseqüencia configurar un estau independient? A respuesta ye clara, porque tot o mundo sabe que ixe referendum levaría a la independencia de Catalunya, y a enterrecar amás definitivament ixe rechimen d’a transición espanyola cubillau en una constitución que estió fruito d’as presions y d’as influyencias de bells poquetz, d’una elite politica y economica aleixada d’o suyo propio pueblo, y que amás ignoró a realidat sobre a existencia de pueblos con personalidat propia, que más tarde u más luego iban a querer eixercer o suyo dreito a decidir.

Pa l’exercicio d’a soberanía por parte d’o pueblo aragonés, lochicament os casos catalán y escocés son sin dubda un incentivo y una muestra de cómo se puet fer frent a una situación aon que quasi totz os medios son por a opción antidemocratica contraria a o dreito a decidir. En diversas enqüestas queda claro que Aragón ye dezaga de Catalunya, Euskal Herria y Galiza o quarteno pueblo de l’estau espanyol con mayor sentimiento de pertenencia y identidat propia como pueblo. Sin dubda ixe ye un dato aon que nos hemos de refirmar pa l’acción present y futura. Estoi sincerament que en ixe marco d’o que charrabanos antes, o d’a descomposición d’os estaus-nación, y cómo amás en ells os poders economicos son devastando os dreitos d’os y as treballaderas, cada vegada más chent optará por tener como referencia a necesidat d’un Aragón soberano, emancipau, con un estau propio, que guarancie a os suyos ciudadanos totz os dreitos y libertatz que en iste momento pretenden furtar-nos os mercaus financiers, sin que os estaus-nación faigan brenca pa evitar-lo.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.