Sudafrica anuncia a o mundo a muerte de Nelson Mandela

Nelson Mandela dirichió o país de Sudafrica d'o racismo y d'a dictadura a la democracia

Nelson Mandela en 2008. Foto: South Africa The Good News (CC-BY)

Nelson Mandela en 2008. Foto: South Africa The Good News (CC-BY)

O gubierno sudafricano ha anunciau a muerte en casa suya de Nelson Mandela.

Nelson Mandela ha estau reconoixiu en tot o mundo por a esfensa d’os dreitos humanos, y pasará a la historia como icono d’a luita contra l’apartheid y por a igualdat social. Pasó vintisiet anyos d’a suya vida zarrau en a prisión, y en salir escayeixió o primer president negro de Sudafrica y recibió o premio Nobel d’a Paz de 1993. A suya ye una historia de luita y dialogo en favor d’a chusticia y a paz.

Mandela naixió en 1918 d’Umtata, en a provincia de Cabo Oriental de Sudafrica, y estió o primer advogau negro de Johannesburgo, de conchunta con Olivier Tambo.

L’anyo 1944 entró a formar parte d’o Congreso Nacional Africano (ANC), partiu que luitaba contra l’apartheid, una segregación racial que s’institucionalizó en 1948, quan o Partiu Nacional plegó en o poder.

En 1952 Mandela estió trigau vicepresdent de l’ANC, y emprendió una campanya de desobediencia civil contra as leis inchustas, que culminó o 6 d’abril de 1952, quan se commemoraban os 300 anyos d’a fundación de Ciudat d’o Cabo y a plegada d’os primers blancos en Sudafrica. D’os 10.000 manifestants, 8.500 estioron detenius, entre ells, Mandela. Estió condenau a nueu meses de prisión y arresto domiciliario, y mientres iste tiempo organiza l’ANC en celulas clandestinas.

En 1955 reapareixió en publico, y l’atro anyo estió deteniu unatra vegada acusau de traición. En 1961 estió absuelto, pero en 1964 estió condenau a cadena perpetua por a vinculación con o brazo militar de l’ANC.

No estió liberau dica 1990. Vintisiet anyos engarcholau en condicions muit duras. Entre iste tiempo, estió fendo-se un simbolo a nivel internacional. Asinas, en salir d’a prisión estió eslechiu president de l’ANC, en substitución d’Olivier Tambo. Mandela esfendió a conciliación y negociación con o gubierno, y a renuncia a la violencia a cambeo de l’abolición de l’apartheid.

As negociacions pa meter fin a la segregación racial ocurrioron entre 1990 y 1993, y culminoron con as esleccions de 1994, en que Nelson Mandela estió trigau o primer president negro de Sudafrica.

L’anyo 1993, Mandela recibió o premio Nobel d’a Paz, conchuntament con F. de Klerk, zaguer president d’o rechimen segregacionista.

Mandela encabezó un gubierno centrau en a reconciliación entre 1994 y 1999. Mientres ista presidencia, y pa privar a impunidat en as responsabilidatz de l’apartheid, instituyó o Comité pa la Verdat y a Reconciliación, presidiu por Desmond Tutu. Tamién en aquell periodo, concretament o 24 de chunyo de 1995, se realizó a final d’o Mundial de rugby, an que a selección sudafricana, os Springboks, se proclamó campeona d’o mundo en Johannesburgo contra os Ajo Blacks neozelandeses. Un feito que o periodista John Carlin pilla en o libro ‘O factor humano’ (La Campana, 2009) pa explicar o paso de l’apartheid a la democracia sudafricana, con Nelson Mandela de catalizador.

Nelson Madela se retiró d’a vida publica en 2004, tres anyos dimpués d’haber-le diagnosticau un cancer de prostata.

Fuent: http://www.vilaweb.cat/noticia/4099895/20131205/sud-africa-anuncia-mon-mort-nelson-mandela.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.