Susana Díaz (PSOE) vence en as eleccions andaluzas y continará como presidenta

O bipartidismo (PP-PSOE) estomaga en Andalucía repartindo-se 80 d'as 109 cadieras. Podemos y Ciudadanos bi irrumpen con 15 y 9 cadieras respectivament

Susana Díaz. Foto: Junta Informa (CC-BY-SA 2.0)

Susana Díaz. Foto: Junta Informa (CC-BY-SA 2.0)

L’actual presidenta andaluza, Susana Díaz (PSOE) continará en o suyo actual cargo, dimpués d’aconseguir o suyo partiu 47 cadieras en o Parlamento andaluz (as mesmas que en tien en l’actualidat). O PSOE se levó o 35,93% d’os votos emitius (un 4% menos que en 2012), y perdió quasi 120.000 votos. Son os piors resultaus d’o PSOE en unas eleccions andaluzas.

O electorau castigó a o PP, que s’espaldó como anunciaban as enqüestas y baixó d’os actuals 50 diputaus a 33 con o 27,13% d’os votos, un 14% menos de votos. Podemos, con Teresa Rodríguez, irrumpe en o Parlamento andaluz con 15 diputaus (15,04%), constatando a fuerza d’ista formación de nomás una anyada de vida, encara que insuficient pa disputar a presidencia.

Atra formación que s’espalda ye IU, que baixa d’as actuals 12 cadieras a 5 (6,98% de votos), perdendo un 4% de votos. A irrupción de Podemos y o desgaste d’IU en o gubierno de Manuel Griñán y Susana Díaz les ha puesto costar cadieras.

Ciudadanos s’estrenará tamién en o Parlamento andaluz, entrando con 9 diputaus (9,41%). UPyD, por a suya parte, se quedó unatra vegada fuera d’o reparto de cadieras, aconsiguindo nomás un 1,95% de refirmes. A participación fue d’un 63,94%, unos tres puntos mas que en 2012.

Con istos datos, Susana Díaz s’ha quedau a 8 cadieras d’a mayoría absoluta. A presidenta andaluza ha afirmau que gubernará en solitario, considerando que tien una estabilidat que no teneba antes“, referindo-se a o suyo gubierno en coalición con IU. Asinas Díaz zarra a puerta a pactos de gubierno con atras formacions. Díaz ha expresau que tendrá capacidat pa escuitar a tot o mundo, sumar y unir“, amás d’afirmar que s’estará toda a lechislatura en Andalucía.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.