Swiftkey publica lo primer teclau predictivo en aragonés pa mobils y tauletas

La nueva versión d'o popular teclau incorpora l'aragonés en a suya versión pa dispositivos Android

Screenshot_2016-08-17-20-39-56

Configuración d’o teclau

Gracias a SwiftKey, los dispositivos mobils y tauletas Android ya tienen un teclau predictivo en aragonés. La interpresa anglesa, que ye estada crompada estianyo por Microsoft, ha anyadiu la nuestra luenga en a suya zaguera versión, chunto con atras luengas como l’occitán, l’asturiano, lo kurdo u lo maltés (una d’as luengas oficials d’a UE).  Ista aplicación ye instalada entre 50 y los 100 millons de dispositivos y ye lo principal competidor a los teclaus que amaneixen por defecto en os sistemas operativos Android y iOS. Manimenos, los usuarios de dispositivos Apple habrán d’aguardar a futuras actualizacions, ya que por agora lo teclau no puede emplegar-se en aragonés que en la versión d’Android.

Imachen d'o teclau Swiftkey.

Imachen d’o teclau Swiftkey.

L’aplicación puede descargar-se de gratis dende Google Play. Seguindo las instruccions de l’aplicación, u las que Softaragonés nos ofreixe en o suyo wiki, puede instalar-se lo teclau aragonés. Lo teclau predictivo, como fan istas aplicacions aumenta la velocidat d’escritura mirando de predecir la parola que queremos escribir, basau en lo contexto anterior y lo propio aprendizache que fa de la traza d’escribir de l’usuario. Atras caracteristicas de Swiftkey son la posibilidat d’escribir sin debantar lo dido d’a pantalla (eslizando lo dido pa formar la parola deseyada) y la opción de tener activos dica tres idiomas. En iste zaguer caso, Swiftkey tiene en cuenta totz los idiomas trigaus u mira de detectar en qué idioma ye escribindo l’usuario.  La versión aragonesa ha estau programada por Julien Baley con a colaboración de Softaragonés, aprendendo lo modelo d’un corpus de blogs y textos literarios y periodisticos, incluyindo Arredol.

Dende Softaragonés sinyalan que lo teclau predictivo continará millorando en as siguients versions, y que las aplicacions locals de cada usuario tamién amillorarán lo suyo rendimiento con l’uso, ya que son capables d’aprender a partir d’a traza d’escribir de cada usuario. Tamién destacan que un teclau predictivo yera una d’as ferramientas que mas les demandaban en zagueras los usuariosd’atros programas, y creyen muit positivo que una interpresa con a penetración en o mercau que tien SwiftKey haiga feito iste paso pa facilitar la utilización de luengas chicotas como l’aragonés.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.